Menu

La eurodiputada d'IX reprocha a la derecha europea que baltara la so propuesta pa establecer oxetivos venceyantes o introducir la perspectiva de xéneru nes polítiques de planificación medioambiental.

La eurodiputada d'Izquierda Xunida Ángela Vallina cree que'l Parlamentu Européu “dio un pasu bien importante na llucha contra'l cambéu climáticu”, dempués de que la comisión de Desenvolvimientu Rexonal (REGI) aprobara ayeri'l so informe sobro El papel de les ciudaes y les rexones na aplicación de los alcuerdos de la COP 21. El testu, una vegada añedíes les enmiendes presentaes polos distintos grupos parlamentarios, va unviar a votación nel plenu posiblemente nel mes de marzu.

“Toi bien satisfecha col ésitu que l'informe tuvo na votación de REGI. Creo que'l Parlamentu dio un pasu importante na llucha contra'l calentamientu global y esperamos que sía igualmente refrendáu por una mayoría apolmonante cuando se vote definitivamente na sesión plenaria”, señaló. El documentu, que cuntó con 33 votos favorables, cuatro en contra y una astención, pretende “poner na axenda política de más altu nivel la llucha contra'l cambéu climáticu”.

Vallina esplicó que na so ellaboración, “participaron dellos espertos na materia”, coles mires de “recoyer una demanda social importante”, como ye'l respetu polos alcuerdos sobro'l clima de París.

“Consiguimos un consensu mayoritariu de tolos grupos políticos, porque entendimos que'l problema ye tan enorme y urxente que merecía la pena faer un esfuerzu de compromisos”, dixo Vallina, quien, sicasí, llamenta que “ello implicó anidiar el testu en dellos apartaos”.

Mientres la votación aprobáronse delles enmiendes qu'esanicien propuestes que yeren bien relevantes”, como por casu “la ellaboración y execución de planes obligatoriamente venceyantes pa los Estaos y les autoridaes local y rexonal”. Coles mesmes, “el pidimientu de midíes p'acoyer a refuxaos ya inmigrantes por motivos climáticos”, o “la parte del informe qu'espresaba que los sectores sociales más vulnerables son aquellos que más riesgu tienen de sufrir les consecuencies del cambéu climáticu y, poro, aquellos nos que se debe poner más atención a la de planiar midíes”.

A lo último, esplicó, “tampoco s'aceptó la propuesta de que se considerara la perspectiva de xéneru a la de planiar ya implementar planes de mitigación y adaptación”.

“La derecha ye la derecha, y va siguir siendo mientres una parte importante de la población déa-yos el so sofitu – siguió-, pero ¿qué podemos esperar si'l comisariu européu d'Acción pol Clima tien negocios familiares n'importantes compañíes petroleres?”.

“El cambéu climáticu ye una evidencia incontestable y una realidá yá cotidiana. Les evidencies sobro la responsabilidá humana nel cambéu climáticu tán fora de toa dulda y tienen yá efectos medioambientales devastadores y elevaos costos socioeconómicos, cuantimás sobre les poblaciones más vulnerables”, señaló Vallina, antes d'aprofiar que “la UE tien muncha xera per delantre”.