Menu

Isabel Guardado recuerda qu'IX bien revindicando de forma histórica acabar colos privilexos n'impuestos a les propiedaes ayenes al cultu de les organizaciones relixoses

Avanza Valdés y el PSOE algamaron un alcuerdu sobro ordenances fiscales que va dexar aprobar el cobru a les eléctriques pol usu del suelu públicu, y el IBI a la Ilesia, naquelles propiedaes ensin rellacionar directamente col so usu pal cultu. Tratase d'un pactu puntual pero que supon una meyora na política impositiva de Valdés pa llograr una recaldación más equitativa. La medría de recaldación va sirvir, siquier en parte, pa sofitar el texíu granible local por culpa de que se preven, amás, bonificaciones pa tratar de desaniciar la situación xenerada pola crisis global de la COVID-19. La vocera d'Avanza Valdés, Isabel Guardado, destacó la importancia d'esti compromisu que supón unu de los alcuerdos más "progresistes" y de mayor caláu de les últimes décades en Valdés. "Tamos satisfechos por esti alcuerdu: per un sitiu creo que les bonificaciones al nuesu texíu granible local van ser un aliviu énte una situación tan grave como la que vivimos pero, amás, ye importante destacar que llogramos meyores na equidad fiscal y la xusticia recaldatoria".

Valdés, esplicó Guardado, va poder sacar tamién provechu del usu del so suelu públicu per parte de les grandes empreses, al igual que yá se fai n'otros conceyos d'Asturies y España, de la que se va resolver una anomalía nel tratamientu fiscal a los bienes eclesiásticos, nun modelu yá superáu. "Nun estáu aconfesional nun tien sentíu caltener exenciones a entidaes relixoses cuando se trata de propiedaes que'l so fin nun ye'l cultu sinón que forma parte d'un patrimoniu inmobiliariu destináu en munchos casos a negocios. N'Izquierda Xunida llevábamos muncho tiempu pidiendo que, d'una vegada por toes, acabar con esti anacronismu que nun almite xustificación dalguna".

"Creo con sinceridá que ye un bon alcuerdu pa Valdés, pal nuesu texíu granible y tamién pa la equidá fiscal", afitó Isabel Guardado.

El compromisu va dexar tamién l'amenorgamientu de les tases d'ocupación de suelu públicu pa negocios d'hostelería y la bonificación del IBI a los propietarios d'edificios que recuperen les sos fachaes.

En cuanto a la fin de les exenciones tributaries qu'hasta agora esfrutaba les instituciones relixoses va ser con calter xeneral con independencia de la so confesión.