Menu

La iniciativa, solo refugada por PP y VOX, encamienta al Gobiernu a la creación del Institutu y del Conseyu de la Memoria Democrática.

La Xunta Xeneral aprobó güei una proposición non de llei defendida por Izquierda Xunida pa la reconocencia de los alcaldes republicanos asesinaos pola dictadura, ya impulsar actos de reconocencia a los asturianos deportaos a campos de concentración nazi. Solo PP y VOX amosaron oposición a la necesidá de reactivar les lleis de memoria democrática. Ello ye que la vocera parlamentaria, Ángela Vallina, xustificó precisamente la oportunidá d'esta iniciativa, énte l'incumplimientu tantu de la llei estatal como l'autonómica nesta materia, polo qu'encamentó al Gobiernu asturianu por qu'adopte toles midíes al so algame p'asegurar el respetu a esta lexislación que forma parte del procesu de verdá, xusticia y arreglu.

La PNL encamienta, amás, al Conseyu de Gobiernu a acelerar el desenvolvimientu de la Llei del Principáu d'Asturies de Memoria Democrática por aciu l'aprobación del so reglamentu y la puesta en marcha de los órganos ya instituciones que contempla, bien particularmente l'Institutu de la Memoria y el Conseyu de la Memoria Democrática.

Al pie de too ello, tamién plantega dedicase el próximu día de 31 d'ochobre, instituyíu pola Llei 20/22, de Memoria Democrática, como día d'alcordanza y homenaxe a toles víctimes del golpe militar, la Guerra y la Dictadura.

Ángela Vallina recordó qu'esta reconocencia ye necesaria pos, na so gran mayoría, el so únicu delitu foi'l de representar a les sos conciudadanes y conciudadanos: "ostentaben un cargu públicu de representación municipal –una alcaldía- nunos momentos tristemente amargos na hestoria d'España, yá que se taba violando y destruyendo nada menos que la Democracia. Munchos d'estos alcaldes pertenecíen a partíos d'izquierdes, otros nin siquier eso, nun pertenecíen a nengún partíu, namá taben exerciendo un serviciu públicu. Esa yera la so única acusación: cumplir con un deber democráticu, y llegal, de representación mientres la Segunda República Española".

Esta proposición non de llei, enfatizó Ángela Vallina, ye de xusticia democrática que, aseguró, "a naide debe d'estrañar que surda d'una fuerza como la mía, claramente municipalista y que yá nes primeres elecciones a los Conceyos llevábamos como eslogan “quita un cacique y pon un alcalde”.