Menu

IX reprocha una llexislatura na que se reculó medioambientalmente y pide que se mire a puertos como A Coruña o Santander, meyor dotaos n'infraestructures que’l de Xixón

El diputáu y coordinador xeneral d'IX, Ovidio Zapico, pidió güei dotar a los muelles xixoneses de cubiertes pa los graneles coles mires d'embrivir la polución que xenera'l tráficu de minerales, El parllamentariu encamentó, amás, qu'Asturies “mire” a puertos como'l d’A Coruña o Santander, “bien de meyor asitiaos dende un puntu de vista d'infraestructura que'l d'El Musel, que más bien yera un puertu propiu de Centroamérica”. Zapico aportunó na necesidá d'adoptar midíes de prevención y na inversión: “precísase asfaltar más metros cuadraos; precísense más apantallamientos; precísase emplegar más los tensoactivos. Dieron resultáu nel so momentu, pero agora, siquier visualmente, hai yá enforma qu'en El Musel nun se tán utilizando”.

Toes eses circunstancies facilita, enfatizó’l diputáu, que'l vientu mueva con más facilidá les polvorees de carbón. Por ello, ademas de la inversión, defendió la inspección p'asegurar cuestiones como la llavadura de ruedes de los camiones.

Mientres una entruga realizada güei nel Plenu de la Xunta sobre les midíes adoptaes p'amenorgar l'impactu medioambiental del manexu y atroxu de graneles, especialmente carbón, nel Puertu del Musel en Xixón, Ovidio Zapico amosóse convencíu de que cuntar con graneles cubiertos va ser “vital” pa embrivir riesgos, siguiendo modelos que yá operen n'Asturies en casos onde tamién se producíen problemes d'esti tipu. “Una empresa pública n'Asturies, Hunosa, en Mieres, tolo que tien que ver con El Batán, tien tou esi sistema, de cintes tresportadores, d'atroxu, etcétera, etcétera, cubiertu”, exemplificó.

Ovidio Zapico llamentó qu'estos problemes vuelvan de nuevu al alderique parlamentariu yá que, recordó, yá en 2015 treslladó a la Cámara les falles na xestión de los graneles de los muelles xixoneses y que tien d'inscribise nuna llexislatura onde, llueñe d'avanzar, reculóse en materia de protección de la redolada. “Esta llexislatura nun foi satisfactoria en materia medioambiental n'Asturies. Nun avancemos n'El Musel; siguimos con índices de contaminación alarmantes; nun se ta mediando la materia sedimentable, daqué que n'Asturies yá se daba por superao va décades y que vuelve apaecer agora; aldericamos enforma nesta Cámara sobro esa llei calidable Ambiental que s'aprobara apocayá, que pa nós ye un pasu tras y, a última hora, nun podemos amosanos satisfechos”.