Menu

La directora xeneral de Memoria Democrática, Begoña Collada, comprometese a trabayar estrechamente col Conceyu de Mieres na dignificación y visualización de les 11 fueses comunes del conceyu

El Gobiernu del Principáu comprometióse esta mañana col Conceyu de Mieres a collaborar de forma permanente en toles actuaciones que sirvan pa recuperar y poner en valor la memoria democrática d'esti conceyu. La directora xeneral de Memoria Democrática, Begoña Collado Villa, anunció qu'una de les principales llínees nes que se comprometieron a trabayar conxuntamente ye en “ufiertar una visión netamente memorialista” a l'aula didáctica del Pozu Fortuna.

Tanto Collada Villa como la viceconseyera de Derechos Ciudadanos, Beatriz González Prieto, entienden que “esti ye unu de los llugares más relevantes non yá pal conceyu de Mieres, sinón pa toa Asturies”, polo que ye inesplicable que l'aula didáctica namái fale de patrimoniu mineru.

En axuntándose esta mañana cola vicealcaldesa de Mieres, Teresa Iglesias, y cola conceyala de Memoria Democrática d'esi mesmu conceyu, Nuria Ordóñez, na see de la Viceconseyería de Derechos Ciudadanos, la directora avanzó la intención de sofitar tamién “política y económicamente” la dignificación y visualización de les 11 fueses comunes que, según los estudios, alcontráranse nel conceyu.

Otra les iniciatives a les que l'Executivu autonómicu va sumar el so respaldu nesti conceyu ye l'allugamientu de les piedres de la memoria que formen parte del proyectu Stolpersteine. El Principáu asitió hasta la fecha 33 d'estos adoquinos, que'l so oxetivu ye rindir homenaxe a les víctimes del nazismu, de los 188 que tien previsto instalar en collaboración col grupu de trabayu Deportaos Asturies mientres la presente llexislatura.

Dambes alministraciones van trabayar coles mesmes de forma estrecha na promoción de los llugares de la memoria.