Menu

La diputada axuntóse güei con vecinos y comerciantes que dicen sentise “abandonaos” y reprochen que, a una selmana de Selmana Santa, tea ensin resolver la habilitación de zones d'estacionamientu

La diputada d'IX Convocatoria por Asturies. Delia Campomanes pidió güei “coordinación” ente les distintes alministraciones, inlcuyíu l'órganu xestor del Parque Nacional de los Picos d'Europa, pa ordenar y resolver los problemes de movilidá y estacionamientu d'esti territoriu polo xeneral y de Sotres en particular. La parllamentaria axuntóse hai dellos  minutos con representantes de residentes y comerciantes d'esta localidá cabraliega, que reprochen que, a unos díes de la Selmana Santa ta por resolver el grave problema d'aparcamientu y colapsu que sufre, nos períodos vacacionales esti enclave.

Esa coordinación, según Campomanes, tendría de ser liderada pola Conseyería competente pa buscar soluciones de movilidá, creación d'aparcamientos disuasorios, y pa favorecer más frecuencies nel tresporte colectivu que pueda llegar hasta la zona. L'oxetivu, resumió, ye llograr una convivencia "equilibrada" ente vecinos, comerciantes y turistes.

Pa la diputada, esta coordinación ye especialmente necesaria nestos momentos, nos que ta en plenu alderique la importancia del retu demográficu, la llucha contra la perda de población y la puxanza del turismu. Nesti sentíu, señaló que, al so xuiciu, “ye difícil que la xente vaiga querer quedase a vivir nos pueblos, cuando, si nun ta coordináu y reguláu, puede suponer dificultaes”.

Los vecinos y comerciantes de Sotres amosaron, pela so parte, tar fartucos énte un problema que se repite en cada nuevu períodu vacacional y que, nesta primer cita del 2024, complícase pola falta del aparcamientu informal que s'habilitaba nuna cortil averáu al únicu parquímetro del pueblu -d'unes 30 places- y que, anguaño, nun va poder ser ocupáu, por culpa de que los propietarios niéguense al tar pindios, entá, del cobru de los 2.000 euros del arriendu correspondientes a 2023.

Per parte de los representantes de vecinos y comerciantes, faló Jessica López, que, amás ye la presidencia de la D.O Cabrales.  Según López, sería necesariu habilitar siquier unos doscientos estacionamientos
 

Jessica Lopez cree que sería necesariu un estacionamiento pa 200 vehículos; reprocha que quien viven na redolada del parque nacional, como nesti casu, Sotres, tán obligaos por importantes restricciones, pero que sicasí nun tienen nengún tipu de servicios nin facilidaes pa poder vivir y trabayar nesta zona. “Tamos a una selmana de Selmana Santa y nun hai arrendaos aparcamientos”. La falta de zones d'estacionamientu, denuncia Jessica López, xenera un caos que supon “una mala imaxe del Parque Nacional, de Sotres, d'Asturies Paraísu Natural, que ye penosa”.

Y ye que, asegura López “dedicamos tol añu a vender Asturies, el Picu Urriellu, los productos calidables y, depués, la imaxe que damos, pos nun tien nada que ver. Ye bien murnio, bien llamentable”.

La falta d'infraestructures, tampoco sirve p'atraer nueva población. “Este ye un pueblu pequenu onde vivimos muncha xente apostamos por venir al mediu rural, crear negocios, invertir una cantidá d'euros nos nuesos negocios y vemos que too son obligaciones, too son pagos, too son cuotes, too dineru, pero a nós nun nos repercute en nengún favor. Lo que nos sentimos ye escaecíos, maltrataos”.

Tocante a los estacionamientos, esplica Jessica López, lo que se ta pidiendo ye un aparcamientu de 200 places que, esclaria, intégrese: “nun queremos nada estravagante nin pidimos nada imposible”.