Menu

Ovidio Zapico y Yolanda Díaz amuesen el sofitu de los Gobiernos d'Asturies y d'España al pidimientu d'indultu para 'les 6 de la Suiza"

El conseyeru d'Ordenación del Territoriu, Urbanismu, Vivienda y Derechos Ciudadanos, la Ministra de Trabayu, y el voceru de Convocatoria por Asturies axuntáronse güei na Xunta Xeneral con estes trabayadores condergaes a cárcel por la so acción sindical 

"Facer sindicalismu nun ye delito", aseguraben güei n'asturianu y castellán el diputáu y Conseyeru d'Ordenación del Territoriu, Urbanismu, Vivienda y Derechos Ciudadanos, Ovidio Zapico, y la vicepresidenta segunda del Gobiernu Central y ministra de Trabayu, Yolanda Díaz, y el voceru de Convocatoria por Asturies na Xunta Xeneral, Xabel Vegas, que güei dieron una rueda conxunta en sofitu de 'les seis de la Suiza", pa quien el Gobiernu d'Asturies pidió l'indultu, n'una midida que, anunció Díaz, tamién va cuntar col respaldu del Gobiernu d'España.

Zapico, Díaz, y Vegues axuntáronse esta mañana con les trabayadores condergaes a entrar en prisión, tres una sentencia nes que se punxo en cuestión los derechos sindicales y que, coincidieron toos, plantégase como un fallu "exemplarizante" que lo que busca ye amedranar les lluches llaborales. 

Ovidio Zapico recordó qu'esta mesma selmana'l Conseyu de Gobiernu alcordó sumase al pidimientu d'indultu, y dar treslláu del alcuerdu a la Secretaría d'Estáu de Xusticia. "Incoamos l'espediente dende la Conseyería d'Ordenación del Territoriu, Urbanismu, Vivienda y Derechos Ciudadanos, enmarcáu amás na competencia en redol a la participación ciudadana y ñlo ficimos col convencimiento de que lo que ta pasando con estes seis persones ye daqué inhumanu, ye daqué dafechu inxustu".

Pal Conseyeru, esa sintonía colos derechos de les clases trabayadores, puesta de manifiestu tantu n'Asturies como agora en Madrid, pon de manifiestu, "la importancia de los Gobiernos de coalición progresistes en Comunidaes Autónomes y en Conceyos y nel país. Yo creo qu'a naide se -y escapa que si'l Gobiernu d'Asturies nun tuviera esi componente d'esquierda que nós representamos, posiblemente, esti alcuerdu nun se llevara a cabu".

Pela so parte, la Ministra de Trabayu treslladó la solidaridá" del Gobiernu d'España al colectivu: "Toi equí en defensa de los derechos de el trabayadores y de el trabayadores y, güei, particularmente, de los de les 6 de La Suiza, a quien treslladé la solidaridá del Gobiernu d'España. Nun da igual quien gobierne: colos derechos llaborales nun se xuega"