Menu

El Coordinador xeneral d'IX d'Asturies, Jesús Iglesias, denuncia la decisión de Renfe de treslladar "en curtia" los modernos trenes Alvia, que conecten anguaño'l Principáu y Madrid, a la nueva llínea d'alta velocidá ente la capital española y Valencia, lo mesmo que de sustituyilos por otros "más antiguos y con menor capacidá" de viaxeros.

Asina s'esprende de la respuesta del Ministeriu de Fomentu a entrugues del diputáu federal d'IX, Gaspar Llamazares énte los rumores de retirada de los Alvia qu'anguaño viaxen a Asturies.

Jesús Iglesias considera qu'esta respuesta supon una nueva marxinación de les conexones asturianes por ferrocarril que respuende puramente a criterios economicistas porque va dexar faer más viaxes con mayor númberu de pasaxeros ente Madrid y Valencia, en desterciu del serviciu a los asturianos.

Na contestación al planteamientu de Llamazares, el Gobiernu argumenta que les prestaciones de los trenes sustitutivos van ser les mesmes y hai aduz, amás, razones meteorolóxiques pal cambéu, según l'adecuación de la ufierta a la demanda. En concretu, los trenes de la serie S-120 (los más antiguos) ufierten 76 places menos que los del modelu S-130 (qu'anguaño empresten el serviciu Asturies-Madrid), pero, según la respuesta del Gobiernu, “ufierten los mesmos niveles de prestaciones, calidá, confort a bordu, servicios básicos y complementarios”. Tou esto ye falsos, sostien Iglesias, porque los modernos Alvia “nunca tuvieron problemes” mientres el periodu de nevaes y, amás, “un tren más antiguu difícilmente va tener más alternatives ante estos problemes”. La sección sindical de CCOO en Adif sofita estes esplicaciones d'IX sobre les diferencies de los Alvias S-120 y 130 y se contraponen a les del Ministeriu de Fomentu.

Iglesias dixo que los asturianos “nun tienen la culpa” de nun cuntar con llínees d'alta velocidá na so rexón y, por tanto, nun poder satisfaer los intereses economicistas” del Gobiernu.

El Coordinador d'IX recordó que los asturianos llevamos años reivindicando tener alta velocidá por que dexara que la rentabilidá que pretenden consiguir na Comunidad Valenciana pudiera llograse equí, pero los socesivos gobiernos nel estáu, tantu del PP como del PSOE nun lu han garantizáu, añedió'l coordinador xeneral d'IX d'Asturies..

Nesti sentíu, el Gobiernu tresllada na so respuesta a Lamazares que “les obres de la llínea d'alta velocidá Llión-Asturies (Variante de Payares) prosiguen el so cursu según la programación prevista”, anque a xuiciu d'IX d'Asturies, dempués de munchos años demandando un calendariu d'obres, ésta programación mentada nun esiste y ta al albur de los anuncios que los distintos Ministros y Secretarios d'Estáu faigan cuando visiten la comunidá.