Menu

Aumenta'l númberu de paraes

El candidatu d'IX a la Presidencia del Principáu, Jesús Iglesias, alvirtió que los distintos axustes que realizó'l Gobiernu central ante la crisis tán cutiendo con más durez a les muyeres. Iglesias, que realizó estes afirmaciones en Siero, na celebración de “Les Comadres”, desplicó como baxa la tasa d'actividá femenina cola crisis y aumenta el númberu de paraes en mayor proporción que los varones, lo que “representa una involución”. De la mesma, la crisis sirve pa que separtar más a los trabayadores y ello traduzse en que'l diferencial qu'esistía ente la remuneración salarial ente homes y muyeres aumente. Si la diferencia qu'esiste ente los sueldos d'homes y muyeres supon nestos momentos el 40%, éstes constitúin un efectu en cadena por que supon menos percepción de desemplegu y xubilaciones más baxes.

“Hai un claru procesu de feminización de la probeza”, aprofió'l candidatu d'IX. N'Asturies aumentó un 8% el númberu de muyeres en riesgu de probeza nos últimos años. Del total d'Asturies, 120.000 persones en riesgu de probeza, el 43 per cientu son muyeres.

Les midíes de retayu tomaes pol Gobiernu central que paralicen l'aplicación de la Llei de Dependencia “penaliza” tamién a les muyeres yá que son les principales cuidadores de los mayores, y la reforma llaboral, cola autorización d'establecer hores extras nos contratos a tiempu parcial, van influyir “negativamente” na situación llaboral y personal de les muyeres que son les principales receptores d'estos tipos de contratu que, según Iglesias, “van suponer un aumentu del fraude”.

Amás, indicó que la posibilidá qu'abre esta reforma de poder despidir de forma procedente a un trabayador por cuestiones de absentismu xustificáu que contien la norma va afectar en mayor midida a les muyeres.