El coordinador xeneral d'IX, Cayo Lara, sollertó güei de que los retayos pa 2013 y 2014 van caltenese y que la economía va ser incapaz de remontar.
Ante l'asamblea d'IX Asturies, el cabezaleru de la formación aseguró qu'esiste una fueya de ruta” pa debilitar l'estáu social y que la próxima midida del Gobiernu va ser contra les pensiones. “El presupuestu de 2014, y alcordavos, yá ta escritu: el reaxuste va ser de 50.000 millones, va haber por tantu más recesión, más paru, más congoxa na xente y eso namá puede combatise na cai. Esta derecha que miente, va metese agora coles pensiones, que ye'l siguiente palu que quieren da-y a la xente”.
El líder d'IX aseguró que les midíes contra la crisis nun tán ayudando a reactivar la economía y que la respuesta del PP ye ideolóxica: "Hai muncha xente qu'acaldía sufre más. Hai un ataque despiadáu contra la ciudadanía. Cuando hai más riqueza que nunca ye incomprensible que nos digan que tenemos que vivir peor qu'antes. Hai una alternativa distinta que nun pasa pola política d'austeridá, sinón por una política de más ingresos, lluchando contra'l fraude fiscal y con una reforma fiscal progresiva por que pague más quien más tien y que nos dexe midíes que favorezan l'emplegu”.
HIPOTEQUES Y DESAUCIOS
El Gobiernu del PP, afirmó Lara, “ye la derecha de la mantiella y la peineta, la vieya derecha de clases”, incapaz, dixo de dar respuesta a los auténticos problemes de la ciudadanía. Nesti sentíu, refugó la propuesta sobre los desahucios yá que, dixo, nun va dexar acabar col drama. "El drama ye responsabilidá del PP y el PSOE que lleguen tarde pa resolver un problema frutu de la burbuya inmobiliaria. Dalgunos llevamos años reinvindicando la dación en pagu atopándonos siempres col refugu de PP y PSOE. Agora deciden los dos responsables directos, el PSOE de 300.000 desahucios y el PP de 100.000, sentase nuna mesa pa buscar dalguna solución y aprueben un decretu que nun les resuelve. ¿Por qué? ¿Por qué nun lo fixo'l PSOE o agora'l PP? Porque la llínea colorada márcala la banca, que ye quien diz hasta ónde puede llegase, con unes condiciones que van faer que los desahucios nun paren”.
PaIX, ye indispensable, si realmente quier solucionase la situación de les hipoteques impagadas, tomar cuatro midíes de forma inmediata: "Paralizar los desahucios, convertir hiupotecas n'arriendos sociales, dación en pagu con calter retroactivu y que les viviendes del bancu malu convertir nun bancu de vivienda pública.
Lara aprovechó tamién pa denunciar la situación del pueblu saharagüi y de Palestina. “Güei tase bombardeando de forma inmisericorde la franxa de Gaza. Reclamamos la condena per parte de la comunidá internacional!
