El coordinador xeneral de IU Asturies, Manuel González OrviZ, aseguró güei que l'oxetivu del partíu na Asamblea que celebra en Mieres tien de ser "dar respuesta a los problemes de la sociedá", por aciu del fortalecimientu de la mesma organización.
Nuna intervención na qu'estimó especialmente l'asistencia d'una trentena d'organizaciones sociales y sindicales, el líder d'IX aseguró que ye necesariu llantar un frente común contra les midíes del Partíu Popular que, dixo, "son un golpe d'estáu silenciosu".
Frente a los retayos, esplicó González Orviz, "tenemos y hai otra política. Agora tenemos que fortalecer la nuesa base social, porque ye l'únicu camín pa parar la ofensiva a la que nos tán sometiendo".
Pal líder d'IX, ye indispensable tar sollertes a lo que diz la cai, la ciudadanía y la sociedá civil: "IX tien que falar, pero tien qu'escuchar. Tenemos qu'incorporar otres formes d'entender la izquierda. Movilización n'organización, rebeldía n'alternativa. Equí nun tamos falando del gobiernu, lo que ta en xuegu ye la democracia, les llibertaes. Tamos falando del poder. Tán tratando de camudar les riegles del xuegu y pueden pola nuesa debilidá".
Lo que ta en xuegu, según el coordinador d'IX Asturies, ye más qu'una lexislación más o menos protectora. "Hai un plan preconcebíu pa recular nes conquistes democrátiques. Priorízase la delda sobre los derechos, faciendo que los costos de la crisis recayan sobre la ciudadanía. Lo esmolecedor d'esti golpe d'estáu llegal nun ye que se frene la inversión, sinón que se crea un nuevu marcu regulatoriu que se carga'l modelu social, el modelu de relaciones llaborales y l'amenaza de la deslocalización, que ye otru símbolu de la involución programada
