Menu

IX va defender la clara delimitación de los marcos civil y relixosu. El coordinador xeneral d'IX cree que va haber un gobiernu progresista n'España que “ensin dulda” va ayudar na cooperación ente'l gobiernu autonómicu y el central

El coordinador xeneral d'Izquierda Xunida, Ovidio Zapico, defendió la necesidá d'avanzar nel mandatu constitucional en referise a l’aconfesionalidá del Estáu. La llamada d'atención surde dempués de que, un añu más, l'arzobispu d'Uviéu aprovechara l'altavoz del Día d'Asturies p'alzar un mensaxe retrógradu, contra les muyeres. “Güei, la realidá ye que tamos nun estáu que, subterráneamente, sigue siendo confesional”. Por ello, aportunó, ye imprescindible encetar “cómo nos tenemos que rellacionar los representantes políticos y civiles col estamentu relixosu”.

Pal coordinador xeneral d'IX, “actos como los que vivíamos ayeri na fiesta d'Asturies, coincidiendo tamién cola celebración relixosa, tiénennos qu'abrir a esa reflexón de cómo poder caltener una fiesta d'Asturies que tenga que ser enmarcada nesi modelu d'Estáu aconfesional nel que nun tengamos qu'oyer nin sentir vergüenza poles afirmaciones de líderes relixosos, nesti casu, que pretenden humildar a les muyeres coles sos palabres, que pretenden volver a España a la dómina del blancu y negru”

Pa IX ye necesario delimitar claramente los marcos civil y relixosu, más cuando se tán aprovechando pa llanzar proclames “más propies de VOX que de cualesquier otru estáu”.

Zapico realizaba estes declaraciones al entamu de la fiesta de la militancia de la formación, la necesidá de poner en marcha n'Asturies una dómina de reformismu, na qu'IX Convocatoria por Asturies va tener una especial relevancia, dada la so entrada nel Gobiernu del Principáu.

Zapico reivindicó la capacidá de les fuerces a la izquierda del PSOE p'articulase como una alternativa al traviés de Convocatoria por Asturies que llegó con vocación de permanencia. Ello ye qu’esplicó, nes próximes selmanes va trabayase pa dar a esta plataforma “estabilidá” y una “coordinación permanente” pa garantizar la máxima incidencia política.

Reedición d’un gobiernu progresista n'España

En clave nacional, y a entrugues de los medios, el coordinador xeneral d'IX amosóse confiáu en que va ser posible una “reedición” del gobiernu compartíu de la izquierda que tantes meyores llogró”.

L'entendimientu de la izquierda n'Asturies, que se convirtió nuna de les poques comunidaes autónomes con un gobiernu progresista, pue ser, a xuiciu de Zapico, nun elementu p'ampliar la cooperación cola alministración central. “Tendría que favorecer el clima d'entendimientu y de diálogu col próximu gobiernu progresista d'España'l qu'Asturies sía una de les poques comunidaes gobernaes pola izquierda y más gobernaes pola pluralidá de la izquierda. Ensin dulda va ayudar”.

CC OO defende la puesta en marcha de polítiques de transofrmación

Nesta celebración, a la qu'intervinieron representantes de Más Asturies, Izquierda Asturiana, y el diputáu en Madrid de Sumar, Rafa Cofiño, tamién participó'l secretariu xeneral de CC OO d'Asturies, José Manuel Zapico, quien xustificó la so presencia énte la necesidá de sofitar y reforzar a fuerces que como IX Convocatoria por Asturies defenden una propuesta progresista. Y ye que, aseguró, ye imprescindible la puesta en marcha de polítiques de tresformamientu. “Tamos convencíos de qu'Asturies nun ye nin más nin menos qu'otres comunidaes autónomes; aspiramos a too y, poro, tenemos que defender que la izquierda político y social entiéndesr col movimientu feminista, col movimientu ecoloxista, coles organizaciones sindicales de clase, pa tresformar la sociedá y que la xente nuevo pueda vivir y trabayar na nuesa comunidá autónoma. Creemos que ye'l momentu de pasar de les palabres a los fechos, que la entrada de Convocatoria por Asturies yera una condición necesaria pa esos tresformamientos, pero hai que dir más allá y tenemos que, dende yá, poner enriba de la mesa planteamientos que dexen ameyorar la vida de la xente nun momentu nel que la carestía de la vida sigue tando peles nubes y bien de persones nun pueden llegar a final de mes”.

Dientro d'esi procesu de cambéu, José Manuel Zapico aprofió la necesidá de poner en marcha midíes pa garantizar la fortaleza del sector industrial asturianu y, de forma especial, la so viabilidá y sostenibilidá ambiental. L'oxetivu, dixo, ye que sía un motor pa la xeneración d'empléu estable y calidable.

Fiesta de la militancia

La de güei foi pa IX la fiesta de la so militancia, auténtica protagonista d'una xornada na que, amás homenaxóse a militantes de más edá y trayectoria. Nun actu en Santolaya de Morcín, cientos d'afiliaos y afiliaes quixeron sumase a un actu que ye,amás, l'entamu del cursu políticu nel qu'IX Convocatoria por Asturies vuelvi al Gobiernu d'Asturies con un programa pa un procesu reformista fuerte”.