Menu

La Colexada d'IX sofita una investigación refecha qu'esclarie'l tarrecible accidente que costó la vida a cinco trabayadores na mina de Zarréu

La Comisión Colexada d'IX encetó la situación abierta tres el grave accidente na mina de Zarréu  y va caltener el so allugamientu d'esclariar hasta les sos últimes consecuencies les causes del accidente, les circunstancies nes que se produció y la situación alministrativa d'esta esplotación minera.

La voluntá d'esclariar los fechos ye dafechu compartida y, de la mesma, sofita como propia la decisión de que'l Principáu personar na causa penal que se sigue tres les muertes de los cinco trabayadores de Zarréu.

Sía que non, la Colexada d'IX pide que'l Gobiernu garantice los medios necesarios a la xusticia que precisa munchos sofitos técnicos énte la complexidá técnica de les materies a investigar.

Les investigaciones polítiques, a xuiciu d'Izquierda Xunida d'Asturies, son imprescindibles y pueden y tienen de surdir de la unidá democrática. La gravedá precisa d'unidá institucional, determinación y tresparencia.

Abrir el Gobiernu a la busca de responsabilidaes

El coordinador xeneral de IU Ovidio Zapico, quixo dexar claro, a la fin de la xunta de la Comisión Colexada, que la formación "nun cierra files" con naide: "lo que faemos ye abrir el Gobiernu a la busca de responsabilidaes, que son polítiques, que son xurídiques, que son alministratives, que son técniques, que son inclusive penales".

Ovidio Zapico cavilgó tamién sobre la investigación xudicial en cursu y preguntóse "si tien el Xulgáu de Cangas (del Narcea) abondos recursos pa faer frente a una investigación d'estes característiques. Pos pensamos, albidramos, que posiblemente non, que bien probablemente nun los tenga". 

Nesti sentíu, el dirixente manifestó la necesidá d'asegurar qu'esa investigación  pueda desenvolvese colos medios abondos. "Quixéramos que'l Gobiernu encamentara al Conseyu Xeneral del Poder Xudicial a valorar la posibilidá de que se reforzara, con tolos medios humanos, técnicos, personales que fora necesarios el xulgáu de Cangas".