Menu

El voceru del grupu parlamentariu, Xabel Vegues, esixe la bonificación al cien per cien del peaxe del Güerna hasta que s'esanicie dafechu y qu'apaeza esa bonificación nos Presupuestos xenerales del Estáu.

- _El grupu parlamentariu va defender la llende de renta na matrícula de la universidá porque la clase obrera nun puede pagar los estudios de los fíos de los ricos._

- _Convocatoria por Asturies manifiesta la so esmolición pola Global Sumud Flotilla y pide al PSOE que les midíes sobro Palestina nun se queden en mera retórica._

El voceru de Izquierda Xunida IX-Convocatoria por Asturies, Xabel Vegues, compareció esta mañana na sala de prensa tres la Xunta de Voceres pa tratar trés asuntos de máxima actualidá. De primeres, Vegues fixo “un llamamientu por que la manifestación del día 17 pola eliminación del peaxe del Güerna lleve a la mayor xente posible por que Asturies fale con una sola voz. Creemos qu'esa manifestación tien que ser xuna movilización de tola sociedá asturiana, de tolos actores políticos, sociales y económicos de Asturies y amás faemos un llamamientu tamién a los partíos y les formaciones d'esta Cámara pa fuxir de cualquier tentación de protagonismu, porque ye xuna movilización que correspuende a los ciudadanos y ciudadanes de Asturies que son quien tán pagando esi impuestu regresivu que supon el peaxe del Güerna cada vez que vamos o volvemos del pandu”.

La postura de Convocatoria por Asturies, recordó'l so voceru, ye que “mientres esi peaxe nun suma, bonificar el cien per cien del peaxe y faigo equí un llamamientu al Ministeriu de Tresportes. Los ciudadanos y ciudadanes de Asturies nun pueden siguir pagando un peaxe que la Comisión Europea yá dictaminó que se trata d'una prórroga de la concesión absolutamente illegal. Nin un día más los asturianos y asturianes tienen de siguir pagando esi peaxe”.

La postura de Convocatoria por Asturies ye que “la bonificación del cien per cien del peaxe mientres nun s'esanicie dafechu tien d'apaecer nos presupuestos xenerales del estáu. El nuesu oxetivu claro ye la eliminación, pero mientres nun se faiga, hai que bonificar al cien per cien y eso tien qu'apaecer nos presupuestos”. Esi alderique, va ser un bon momentu “por que los grupos parlamentarios retrátense. Dellos grupos parlamentarios son los responsables de la prórroga illegal del peaxe del Güerna. Gustaríanos pensar que tán a favor de bonificar el cien per cien d'esi peaxe y tendémos-yos xuna mano por qu'asina sía. Hai que faer un exerciciu de tender la mano a otres formaciones polítiques porque ye un asuntu estratéxicu, nun ye bonu entrar en confrontación política, tenemos que falar toos con una sola voz”. Cola esceición de Vox, a quien “lo único que pidimos ye que s'esllea, ye lo único que vamos pidir a la estrema derecha fascista d'esti país. Al PP sí-y pidimos qu'apruebe los presupuestos xenerales del estáu. La obligación d'un gobiernu ye presentar presupuestos ya intentar sacalos cola mayor mayoría posible y eso ye lo que va intentar el gobiernu de la nación”.

Al respective de la tesis del PP de que si'l Güerna tuviera en Cataluña, yá taría suprimíu'l peaxe, Vegues esplicó que “el comodín de Cataluña y el País Vascu ye como'l comodín d'ETA, qu'ayeri utilizó la señora Ayuso nun episodiu que creo que va pasar a l'antoloxía de la comedia nesti país. Un partíu que se diz d'estáu como'l PP nun puede xugar a enfrentar a los ciudadanos d'unes comunidaes autónomes colos d'otres, ye una barbaridá. Ye llamentable que'l PP escoyera esa vía d'oposición, que lo que fai ye estropiar la convivencia y nun ye más qu'una escusa pa tapar la política que fixo'l PP fai 25 años en redol a esi peaxe del Güerna. Ellos son responsables de que paguemos cada vez que pasamos esi peaxe”.

Pa concluyir la tema, el voceru de Convocatoria por Asturies aseguró que “bonificar el peaxe ye un oxetivu con o ensin presupuestos. Con presupuestos ye más senciellu, pero va haber qu'estudiar si esisten otres víes. Tenemos toles víes parlamentaries abiertes, na Xunta Xeneral del Principáu, nel Congresu de los Diputaos y nel Parlamentu Européu. Vamos faer usu de toes elles, con o ensin presupuestos. Hai qu'acabar con esi peaxe, porque afecta a la igualdá d'oportunidaes ente los territorios, pero, sobremanera, ente los ciudadanos y les ciudadanes, que ye lo que más nos importa”.

UNIVERSIDÁ GRATUITA

El segundu asuntu d'actualidá encetáu por Xabel Vegues foi la Universidá: “La selmana pasada, nel Plenu d'Orientación, el presidente Barbón adelantró una propuesta que va llevar a la negociación presupuestaria en redol a la gratuidá de la Universidá en tolos sos cursos. Vamos dir a esa negociación presupuestaria con tola voluntá d'algamar alcuerdos. Siempres nos paez positivu que los servicios públicos sían gratuitos, pero nesti casu, vamos a esa negociación presupuestaria plantegando'l nuesu modelu, que ye un modelu de gratuidá de la Universidá, pero con una llende de renta. Ye importante asitiar una llende de renta porque nun puede ser que los impuestos de la clase trabayadora paguen los estudios de los fíos de los ricos. Paeznos que, ensin llende de renta, pue ser una midida regresiva y puede atentar contra la igualdá d'oportunidaes. Nun s'entiende qu'haya requisitos académicos pa consiguir esa gratuidá na universidá pa esa clase obrera que ta estudiando, pero que munches vegaes tamién ta trabayando y cuésta-yos enforma sacar cursu tres cursu. Sicasí, nun hai otros requisitos económicos que nos paecen imprescindibles pa garantizar la equidad y l'igualdá d'oportunidaes de tolos asturianos y asturianes qu'apuerten a la universidá. Esti asuntu xeneró nos últimos díes un ampliu alderique, salió a opinar el rector d'Universidá d'Uviéu y antiguos rectores. Queremos anunciar la nuesa posición, que ye defender la llende de renta neses midíes, porque la clase obrera nun puede pagar los estudios de los fíos de los ricos”.

GAZA

A lo último, Xabel Vegues encetó l'actualidá al respective de la Global Sumud Flotilla, que “intenta parar el bloquéu contra la población palestina y que va apurrir ayuda humanitaria a una población que ta sufriendo un auténticu xenocidiu. Enterémonos va unos minutos de la retirada del buque de l'Armada española que diba acompañando a esa flotilla. Creemos que ye una mala noticia. L'Estáu español y el Gobiernu español, y equí diriximos al PSOE de Pedro Sánchez y d'Adrián Barbón, tienen de defender al pueblu palestín, tienen de defender la necesidá de reconocer l'Estáu palestín y lluchar contra'l xenocidiu. Non puede quedase en xestos puramente retóricos. Eso implica unes obligaciones, implica la obligación de protexer a los ciudadanos y ciudadanes europeos y españoles que van nesa flotilla pa defender los derechos humanos, los derechos d'esa población que ta sufriendo un xenocidiu. Ye una mala noticia qu'esi buque diera la vuelta y nun protexa a unos ciudadanos de la UE que tán viéndose asediados pol exércitu d'Israel. Tarrecemos lo que pueda pasar con eses persones”.

Al respeutu, “faemos un llamamientu dende Convocatoria por Asturies a la gran manifestación que va haber esti próximu domingu a los dolce y media de la mañana en Xixón, na plaza de la Güelga. Ye una convocatoria que se realiza en munches ciudaes del país y ye importante que tola sociedá asturiana tea ellí clamando contra esti xenocidiu. Repitimos el nuesu llamamientu al PSOE por que la defensa de la población palestina, del Estáu palestín y por que la condena del xenocidiu contra'l pueblu palestín nun se quede en mera retórica. Eso implica unes obligaciones. Tamos esixir dende'l grupu plurinacional de Sumar y esixir tamién dende Convocatoria por Asturies, porque creemos qu'hai que dir más allá na defensa de los derechos humanos y na llucha contra esi xenocidiu que ta marcando'l momentu históricu que tamos viviendo”.