Menu

El candidatu d'IX a la presidencia d'Asturies asegura que'l tratáu facilita faer de los servicios públicos un negociu pa les grandes multinacionales

Ángela Vallina refuga'l TTIP porque supon vender l'Estáu y los sos recursos.

El candidatu d'IX a la presidencia d'Asturies, Gaspar Llamazares, sollertó esta mañana en Xixón del riesgu real pa los servicios públicos qu'abre'l Tratáu de Llibre Comerciu (TTIP) con Estaos Xuníos qu'axusten, de forma opaca, la Unión Europea (UE) y el gobiernu norteamericanu. Llamazares, na manifestación convocada contra esti alcuerdu y qu'axuntó a miles de persones en Xixón, denunció "l'intentu de les compañíes multinacionales de faese con servicios bien importantes como la sanidá, la educación o los servicios sociales, que tán en manos públiques y respuenden a necesidaes de los ciudadanos. Ellos non:" quieren montar un negociu en redol a estos servicios"

Y nun ye l'únicu riesgu. A xuiciu del candidatu y diputáu nacional d'IX Asturies, el TTIP va suponer una baxada nos estándares o garantíes que tienen los ciudadanos en materia d'alimentación o mediu ambiente pa introducir n'Europa tresxénicos o'l fracking.

Igual de tayante amosóse la eurodiputada Ángela Vallina, pa la que les negociaciones suponen una traición a la ciudadanía, yá que se ta realizando con total ocultismu. "Lo qu'ellos dicen que ye una negociación privada pa nós ye una negociación secreta". Esta opacidá demuéstrase, añedió la parllamentaria europea, en que nin siquier ye posible aportar a esa negociación, non yá per parte de los medios de comunicación, sinón yá de europarlamentarios, salvu de forma acutada.

A midida que van trescendiendo detalles de les implicaciones del tratáu más claru queda, esplicó Ángela Vallina, que se trata d'un alcuerdu que namái va beneficiar a les grandes empreses y non a les persones de los Estaos firmantes del TTIP. "Ye absolutamente impresentable. Ye un negociu redondu pa les grandes corporaciones y lo que ye increíble ye qu'estes polítiques neolliberales llévenos a esos estremos de vender absolutamente los Estaos y tolos sos servicios y tolos sos recursos"