Menu

Ovidio Zapico esixe responsabilidaes polítiques ante l'aval de 3,6 millones d'euros de la ITV a la empresa privada, que les sos razones nun consten na acta del conseyu que lu decidió

Francisco Blanco, actual conseyeru d'Industria, apunta al anterior Conseyu d'Alministración de ITVASA, presidíu acordies con los estatutos pol conseyeru d'Industria, Graciano Torre, como responsable de que la empresa pública de les ITV respondiera por la construcción de los circuitos de Cisvial en Llangréu. A entrugues del diputáu d'IX, Ovidio Zapico, sobre quién autorizó que la empresa pública Inspección Técnica de Vehículos d'Asturies (ITVASA) emprestara un aval de tres millones seiscientos mil euros pa la fallida inversión de la sociedá CISVIAL en Llangréu, el conseyeru actual esplicó en see parlamentaria que'l xerente de la empresa pública de les ITV actuó d'alcuerdu al mandatu del Conseyu d'Alministración, previu informe de la Conseyería de Facienda pa responder por esta operación de construcción de circuitos, que s'inauguraron en mayu de 2011 y güei, son propiedá de la ITV, porque la operación fracasó. Ovidio Zapico, diputáu d'IX responsable de los asuntos d'Industria, pidió depurar responsabilidaes polítiques, anque munchos de los actores nun tean na política activa, conocer el papel que'l xerente tuvo nesti procesu y tomar midíes por que nunca se repita, ante una operación que “foi un fracasu más de los que vivimos na Cuenca del Nalón, como foi Venturo XXI”.

IX tamién preguntó poles razones poles que s'autorizó y Francisco Blanco confirmó qu'eses razones “nun consten” na acta del Conseyu d'Alministración onde s'autorizó, anque preguntáu al xerente poles mesmes ésti aseguró-y que la decisión tomóse porque “esistía confluencia d'oxetivos ente les ITV y les actividaes rellacionaes cola seguridá vial que diba realizar CISVIAL”. L'aval, dixo Blanco na Comisión d'Industria del parlamentu, foi necesariu “nun momentu dáu pa rematar la operación”. “Si se respondió por ello foi porque ITVASA yera accionista, y tamién taba Sadim y paecía un proyectu sólidu”, sostuvo Blanco antes d'esplicar que la ITV pidió “garantíes colaterales d'otros accionistes y llogró unos tarrenes en Santa Marina de Piedramuelle, dempués de faer frente a 840.000 como pagu d'unes cuotes consecuencia de la demoranza, y non de 3 millones como dicen ustedes”.

Ovidio Zapico tamién preguntó sobre qué midíes piensa tomar pa depurar responsabilidaes polítiques, societaries o, nel so casu, d'otra naturaleza, consecuencia del aval de tres millones seiscientos mil euros emprestáu pola empresa pública Inspección Técnica de Vehículos d'Asturies (ITVASA) pa la fallida inversión de la sociedá CISVIAL en Llangréu. Nesti casu'l conseyeru actual, sostuvo que “agora mesmu” nun paez qu'esista responsabilidá que sustanciar, cuidando que'l xerente actuó col alcuerdu del Conseyu d'Alministración. Blanco tamién aseguró que nun esiste realmente perda pa la empresa ITV y que esa operación nun afectó pa nada al serviciu qu'emprestaba la ITV.

Tres les palabres del Conseyeru, Ovidio Zapico repitió que la coalición nun entiende por qué s'autorizó a una empresa pública a realizar el mentáu aval, ensin conocencia del Parlamentu y recordó que nun se trata “nunca” d'una empresa de capital riesgu, nin entidá financiera, nin forma parte de nengún preséu de promoción económica, como por casu sería la Sociedá Rexonal de Promoción. De la mesma, el diputáu d'IX preguntó sobre les posibles responsabilidaes contables de quien autorizó la operación.