Menu

Ovidio Zapico refuga que pueda aprovechase la situación creada pola pandemia como una escusa pa la restructuración de plantiyes o devaluación de les condiciones llaborales

Miembros de los comités y trabayadores denuncien que se tán cubriendo puestos en situación de regulación por otros emplegaos de distintes empreses del conglomeráu de tresportes

Izquierda Xunida va pidir al Principáu que revise'l ERTE qu'afecta a distintes empreses de tresporte de viaxeros n'Asturies, venceyaes al grupu ALSA, énte les denuncies de les plantiyes sobro l'intentu d'eses compañíes d'aprovechar la situación creada pola pandemia pa una revisión a la baxa de les sos condiciones llaborales. El diputáu d’IX Ovidio Zapico axuntóse esta mañana con representantes de los comités de la Estación d'Autobuses d'Uviéu, Seprisa Alsa y Ebrobus, que güei se concentraben nes dársenes oventenses pa denunciar la falta d'entendimientu pa recuperar la normalidá na prestación de los servicios. Ello ye que nestos momentos, nos que se recuperó l'actividá, inda se caltienen les regulaciones d'emplegu y eso a pesar de que se tán produciendo atascos qu'obliguen a los usuarios a sufrir llargues coles pa poder movese. "Esos puestos de trabayu tienen de recuperase y en nengún casu tien que sirvir la situación que xeneró la pandemia a esta empresa como escusa pa reestructurar la plantiya, nin como escusa pa faer o crear trabayadores que sían polifacéticos o multifuncionales", afirmó'l parllamentariu pa quien el Gobiernu del Principáu "debe d'actuar y revisar, ensin más retrasa'l ERTE". Polo pronto IX va tresmitir esi pidimientu tanto al Consorciu de Tresportes y al Director Xeneral de Movilidá.

Lo que ta en xuegu, aprofió Ovidio Zapico, ye daqué más qu'un planteamientu sindical y llaboral. "Y el tresporte públicu n'Asturies ta agora nuna situación bien difícil, dempués de la pandemia que sufrimos, nesta vuelta a la nueva normalidá. El tresporte públicu ta en cierta midida estigmatizáu porque hai un mieu social, agora mesmu, y puede xugar un papel que nun sería nada bonu pa la movilidá sostenible na nuesa Comunidá Autónoma la prepoonderancia del coche".

Pa IX, ye imprescindible volver a la normalidá en tolo que tien que ver colos servicios y les frecuencies, polo qu'esa revisión del ERTE per parte de l'Alministración Autónoma ye clave. Asina, señaló Ovidio Zapico, la regulación de personal, col zarru de taquilles, condena a la xente mayor a realizar les sos xestiones en máquines col riesgu que supon, poles dificultaes que-yos suponen. "Vimos lo que pasó va años coles máquines nes estaciones de tren: echó los usuarios del tren de les estaciones; enzanca a les persones mayores, descomanadamente, o a persones con discapacidá, l'aportar a daqué tan elemental pa xubir a un autobús como ye'l billete".

Ramón Carballo, miembru del Comité de ALSA pidió a la empresa la reapertura de les taquilles a horariu normal, como pasu p'amenorgar coles coles de viaxeros. Nestos momentos, la negociación cola empresa sigue pero ensin meyores. "Los viaxeros tresmítennos que tienen de abrir, atendelos y sacar a la xente de les coles".

Nestos momentos, la empresa pretende caltener el modelu alcordáu mientres la Fase II de la desescalada, cuando s'axustó l'apertura de 4 hores, pero que llevaba xuna ampliación progresiva daqué que, denunció Carballo, nun se cumplió.

Pela so parte, María Jesús Chacón, una de les trabayadores de taquilles, reclamó que'l Principáu revise l’ERTE de la Estación d'Uviéu. "Hai trabayadores que tán nel ERTE y los sos puestos de trabayu tán siendo cubiertos por otres persones dientro del grupu llaboral que nunca fixeron estes funciones". Como exemplu, Chacó refiriose al llabor de los caxeros que tán faciendo personal de Rutes del Cantábricu, otra empresa de ALSA n'Asturies, reconocida como grupu llaboral pol Tribunal Supremu.

La forma actual d'emprestar los servicios supón tamién riesgos sanitarios pal personal según esplicó Chacón. "Tán cubriendo cola moza d'Atención al Veceru les máquines y creemos qu'eso nun tendría de ser asina. Pa la salú de trabayadores, ciudadanos y viaxeros, tendríen de tar les taquilles abiertes, que tienen una protección, una mampara".

El descensu de viaxeros tampoco xustifica caltener la regulación. Magar nun tienen datos concretos, tantu Chacón como Carballo coincidieron en que los usuarios van n'aumentu, daqué que puede percibise visualmente nes coles pero tamién de forma empírica na vienta de billetes. "Creemos ye una escusa que ta poniendo pa nun abrir pa consiguir otros fines como ye amenorgar la plantiya o consiguir que el trabayadores dexen el so derechos siendo polivalentes. Por eso pidimos que'l Principáu tome midíes y compruebe qu’ALSA ta mintiendo".