Menu

Ángela Vallina reprocha que se reactive un proyectu bien contestáu polos vecinos y que la so utilidá nel contestu actual nun ta xustificada

Izquierda Xunida refugó güei nel Plenu de la Xunta Xeneral del Principáu la posible construcción de la revesosa subestación eléctrica de Cardu (Gozón), que vuelve tar d'actualidá en reactivándose un proyectu contestáu polos vecinos de la localidá. La vocera de la formación, Ángela Vallina, recordó que se trata d'una iniciativa vieya que Rede Eléctrica Española (REE) pretende reiniciar agora, dempués de trés años d'inactividá tres la so última tramitación y 15 desque la entidá empecipiara'l procesu pa la so edificación. Vallina enfatizó que la noticia llega a pesar de la firme oposición de los residentes na zona, entidaes cíviques, sindicales y del refugu esplícitu de los colectivos ecoloxistes, pola afectación de la Zona d'Especial Protección pa les Aves (ZEPA) de La Granda. "El problema, señor Conseyeru, ye que la construcción d'esta infraestructura, si yá tenía mala xustificación antes, agora, nel contestu enerxéticu nel que tamos, paez cenciellamente absurda. Na coyuntura actual, esti proyectu nun se precisa, yá que nun se precisa un aumentu de les instalaciones de tresporte cuando nun hai más producción eléctrica nin aumentu de consumu previstu na próxima década na zona".

Ángela Vallina alvirtió que'l grau de refugu ye tal que, al so xuiciu, el gran númberu d'allegamientos que se rexistró mientres l'anterior intentu de REE de sacar alantre la subestación va repitise.

Sía que non, pa IX nun hai una xustificación pa llevantar esta infraestructura y entá menos nuna zona d'altu valor paisaxísticu y medioambiental. "Hai que recordar que los indicadores calidables del serviciu eléctricu n'Asturies amuesen un eleváu nivel, bien cimeru a les referencies reglamentaries y a los esistentes años atrás, d'alcuerdu a les memories de REE, que fai inda más innecesaria esta infraestructura", señaló Vallina.

Pa la diputada, esisten entá más razones pa refugar esta instalación inconveniente y peligrosa y que se añede a les yá explícitaes. "Nun se valora l'impactu na salú de los vecinos y vecines colindantes: hai numberosos estudios científicos que respuenden por los riesgos acomuñaos a vivir cerca de les subestaciones y de llínees d'alta tensión como les previstes, daqué que, sicasí, resalvase nel presente casu. Nun se valora l'impactu nel paisaxe; la instalación d'esta subestación y les llínees que d'elles saldríen tendríen un severu impactu paisaxísticu al tar allugaes nuna zona visible dende numberosos kilómetros, lo qu'aumentaría, amás, de manera significativa, l'impactu d'estes instalaciones nel paisaxe rural onde van enclavaes, onde hai numberoses viviendes y esplotaciones ganaderes tremaes. Nun se valora l'impactu na flora y la fauna; la instalación d'esta subestación eléctrica tendría consecuencies medioambientales desastroses pa la fauna del banzáu de La Granda, que quedaría a 400 metros".

Al pie de ello, tampoco se cumple la necesaria adaptación social del proyectu, reprochó Vallina, qu'esplicó que nun se consultó a los vecinos de Gozón, Carreño y Avilés y ello a pesar del so refugu manifiestu, como tamién asocedió nel plenariu del Conceyu gozoniegu.