Menu

La diputada de Convocatoria por Asturies reprocha que los mesmos que desixen rebaxes fiscales y exenciones pa quien más tienen, critiquen ayudes a colectivos de xente nuevo vulnerable

La diputada de Convocatoria por Asturies, Delia Campomanes, reprochó a la estrema derecha'l so allugamientu "en contra" de los intereses de la mocedá. La parllamentaria, aprovechó la toma de posición tres la comparecencia del director xeneral de Mocedá, Francisco de Garráis Fernández Olanda, pa criticar lo que denominó "escentricidaes" de los ultraconservadores que, de la que critiquen ayudes pa la población más vulnerable, esixen rebaxes y supresión d'impuestos pa quien más tienen. "Güei nun diba ser menos que se punxeren en contra de los intereses de la mocedá d'Asturies. Tiénennos avezaos, mes tres mes, coles muyeres, col mediu ambiente, colos trabayadores –nel postreru plenu cuestionando'l Salariu Mínimu Interprofesional (SMI)–, coles cuestiones de diversidá sexual, nun díbamos a esperar otra cosa que güei se punxeren en contra de los intereses de la mocedá asturiano".

La crítica producióse dempués de qu'unu de los diputaos de VOX cuestionara les ayudes pal carné de conducir que tán previstes pa los mozos. "Otra vegada más asistimos a cómo demuestren los sos intereses cuestionando, por casu, les ayudes a al carné de conducir con colectivos de xente nuevo vulnerable, pero, sicasí, plenu tres plenu, lleven ustedes propuestes como la deducción fiscal a les grandes fortunes, subvenciones d'intereses privaos: nada nuevo so esti sol".