Menu

La diputada d'IX Convocatoria por Asturies, *Delia Campomanes, presentó güei en Mieres, xuntu al alcalde Manuel Ángel Álvarez y la conceyala Belén Alonso, una proposición non de llei (PNL) pa la implantación na localidá esta formación

La iniciativa, rexistrada na Xunta Xeneral del Principáu, busca reforzar la formación pública especializada en xestión d'emerxencies, prevención de riesgos ya intervención énte situaciones crítiques. Campomanes destacó que “la emerxencia nun s'improvisa: plániase, coordínase y apriéndese”, sorrayando la necesidá de profesionales cualificaos que puedan responder a fenómenos cada vez más frecuentes, como les quemes forestales qu'anguaño afararon Asturies y bona parte d'España.

L'alcalde de Mieres, Manuel Ángel Álvarez, aseguró que'l conceyu tien tolos elementos necesarios pa convertise nun referente nesti tipu de formación: “creemos que Campus y Formación Profesional tienen que ser los platos fuertes en Mieres. Apostar por ampliar la FP y ameyorala ye xuna estratexa d'esti Gobiernu, xuna estratexa clara”.

El rexidor amosóse confiáu en que Mieres se convierta nel “primer conceyu” del norte d'España que pueda ufiertar esta formación, daqué qu'adquier especial importancia, precisamente pola alta demanda d'esti tipu d'enseñances.

Pela so parte, la conceyala Belén Alonso destacó que la iniciativa respuende a un procesu que vien de llargu y que nun ye frutu de la improvisación: “llevamos dos años trabayando nesta tema. Amás, añedió, l'allugamientu de Mieres “cumple en demasía y apurre valor añedíu a esti ciclu de técnicu cimeru en coordinación d'emerxencies porque tenemos un Campus de Mieres que tien les titulaciones d'Inxeniería Forestal y Ambiental que podríen arriquecer esti ciclu formativu; porque tamién tenemos l'Institutu de Recursos Naturales y Ordenación del Territoriu, que daría valor añedíu y porque tenemos un parque de bomberos cercano”.

La iniciativa supon, amás, xuna apuesta pola descentralización como xuna vía más pa llograr una Asturies más cohesionada territorialmente, nesti casu en referir a la formación, tantu dende la perspectiva de la Comunidá Autónoma como un polu d'atracción pa estudiantes d'otros territorios.

La proposición plantega que'l Conseyu de Gobiernu del Principáu estudie la implantación del ciclu dientro de la planificación xeneral de Formación Profesional, atendiendo a la demanda social y llaboral del territoriu.