Menu

Convocatoria por Asturies celebra l'alcuerdu alcanzáu con PSOE y Covadonga Tomé, nel que se pon l'interés de la ciudadanía nel centru

El voceru parlamentariu de Convocatoria por Asturies, Xabel Vegas, valoró de forma bien positiva l'alcuerdu fiscal algamáu ente la so formación, el Partíu Socialista y la diputada Covadonga Tomé, calificándolo como “xuna magnífica noticia” que, al so xuiciu, reflexa la vocación del Gobiernu autonómicu y de les fuerces de la esquierda asturiana “de ser útiles pa los ciudadanos y les ciudadanes d'esta comunidá autónoma”.

Según esplicó Vegas, el pactu respuende a una voluntá compartida d'impulsar polítiques progresistes y reformistes que prioricen el bienestar social. Nesti sentíu, sorrayó que l'alcuerdu asitia “a les persones nel centru” de l'acción política y constitúi “la meyor representación” d'esa idea.

El voceru de Convocatoria por Asturies detalló que les midíes incluyíes nel pactu busquen protexer el derechu de los asturianos y les asturianes a una vivienda digna, por aciu un gravame específicu “a esos grandes tenedores que pretenden especular con un bien de primera necesidá como ye la vivienda”.

Vegas defendió amás la fórmula de negociación a trés bandes como un métodu “descomanadamente útil” que, según dixo, tendría d'estendese a la ellaboración de los próximos presupuestos autonómicos. Na so opinión, les cuentes públiques son “la clave pa eses polítiques progresistes, pa eses polítiques de fortalecimientu del Estáu del bienestar y tamién pa lo que queda de llexislatura”.

Finalmente, el voceru alvirtió de que “tamos viviendo xuna ofensiva de les dereches” y apeló a la unidá de les fuerces progresistes asturianes. “Ye importante que xunamos por esi oxetivu común que ye reforzar los derechos, les llibertaes y, sobremanera, el nuesu Estáu del bienestar”, concluyó.