Menu

Xabel Vegas confía en llograr los máximos sofitos pa sacar alantre'l presupuestu de 2025 de calter progresista y con un apueste poles viviendes a precios algamadizos

El voceru parlamentariu de Convocatoria por Asturies, Xabel Vegas, aseguró tres la Xunta de Voceres qu'el so grupu trabaya para garantizar l'aprobación d'unos Presupuestos con sellu progresista, centraos na redistribución y la protección de los servicios públicos.

Vegas destacó que l'alcuerdu sobro la fiscalidá “respuende a una vía asturiana que garantiza la progresividad”, amenorgando los impuestos a les rentes más baxes y torgando que les rentes altes beneficiense del efectu abasne. “Nun compartimos el modelu del Partíu Popular, que propón baxar la fiscalidá a les rentes más altes. Eso sería xuna midida regresiva qu'obligaría a retayar n'educación o sanidá”, afirmó.

El voceru aportunó en que la prioridá ye protexer l'Estáu del bienestar, daqué que, en concencia, nun asocedería coles propuestes de les dereches d'amenorgar impuestos a los más ricos. Nesti sentíu, reprochó que toes eses iniciatives de rebaxes fiscales non llegen tamién con esplicaciones sobro les consecuencies que va tener nes polítiques de protección social,  por cuenta del amenorgamientu d'ingresos que, inevitablemente, va producise: “Si baxamos los ingresos públicos, ¿a cuántos maestros o sanitarios habría que despidir?”, preguntóse.

Vegues confirmó qu'el so grupu caltien conversaciones con otros partíos p'ampliar sofitos a les cuentes rexonales, eso sí, reconoció que la sintonía mayor ye con Covadonga Tomé, pero'l diálogu sigue abiertu. "La nuesa obligación como gobiernu progresista ye buscar la mayoría más amplia posible”, esplicó

A entrugues de los periodistes, en relación a un hipotéticu pactu presupuestariu con Foro Asturies, señaló que se van estudiar les sos propuestes “siempres dientro del marcu progresista” y repitió que'l modelu del so grupu apuesta pola vivienda social y l'arriendu algamadizu, frente otres polítiques que se dirixen a favorecer la compra de vivienda, pero que tán siendo un fracasu.