Menu

Emilia Vázquez, diputada d'IX d'Asturies na Xunta Xeneral, entruga a la Conseyería d'Educación pola situación llaboral de los trabayadores que desenvuelven el serviciu d'intérpretes de llingua de signos por aciu una contratación esterna nos centros d'educación Primaria, Secundaria, Bachilleratu, y nos ciclos y Programes de cualificación profesional inicial.

La diputada pregunta si la Conseyería tien previstu abrir pa esti cursu o siguientes una bolsa de trabayu pa intérpretes de llingua de signos qu'empresten los sos servicios en centros educativos y en casu de nun ser asina, si considera que, a los efectos de la valoración de costos llaborales de la ufierta económica, ye d'aplicación el Conveniu Colectivu Xeneral de Centros y Servicios d'Atención a Persones con discapacidá; cómo garantiza l'órganu de contratación el cumplimientu de la ufierta en relación a los derechos retributivos de el trabayadores como'l derechu de subrogación, l'antigüedá y otros contemplaos na lexislación vixente, y, a lo último, si contempla en dalguna de les circulares o instrucciones de funcionamientu de la mesma Conseyería, les competencies y obligaciones d'estos profesionales, más allá de la mera traducción directa, no relativo a los llabores educativos de coordinación, preparación de materies y coordinación colos equipos d'orientación y los profesionales intervinientes nel procesu educativu de cada alumnu o alumna.

La diputada esplica qu'estes 12 persones, amás de los que realicen les sos sustituciones, ven perxudicaos los sos derechos llaborales y retributivos yá que al ser contrataos de forma esterna pa la prestación d'esti serviciu utilízase como criteriu básicu la ufierta económica más   ventaxosa y les meyores del ofertante. Les baxes na llicitación repercuten nel amenorgamientu del salariu y derechos llaborales de los trabayadores.  A manera d'exemplu, el salariu que se xenera per hores trabayaes d'un trabayador o trabayadora a xornada llaboral completa apenes supera los 700 €.

Amás, estos trabayadores qu'empresten una función educativa, nun se-yos ta aplicando'l conveniu que análogamente sería-yos d'aplicación, al nuesu entender, el Conveniu Colectivu Xeneral de Centros y Servicios d'Atención a Persones con Discapacidá (BOE 243, de 9 d'ochobre de 2012). Ye ciertu qu'esclúi a l'alministración, pero nesti casu nun se trata de personal de l'alministración sinón qu'empresten servicios nésta.

Ye obligación de l'alministración non solo velar pol aforru económicu na prestación del serviciu, innegable, sinón qu'hai de velar, tamién, porque les ufiertes presentaes cumplan cola llegalidá vixente. Ente otres, que los costos de personal afayense al conveniu, pos, de nun ser asina y nun xustificase esti estremu, la ufierta nun tuviera de ser considerada.