Menu

Valledor considera mui graves les imputaciones de Buendía escontra la Empresa asturiana y cree necesariu que queden aclaraos

Valledor considera mui graves les imputaciones de Buendía escontra la Empresa asturiana y cree necesariu que queden aclaraos

El Diputáu del grupu parlamentariu d'Izquierda Xunida- Bloque por Asturies-Los Verdes, Francisco Javier García Valledor, manifestó güei que les esplicaciones daes pol Conseyeru Buendía sobre les razones del sobrecoste de les obres d'ampliación del Puertu del Musel na so comparecencia ante la Xunta Xeneral del Principáu “pon de manifiestu una grave situación d'imprevisión que mos costó al conxuntu de los contribuyentes la nada despreciable cifra de 200 millones d'Euros o lo que ye lo mesmo casi 35.000 millones de les antigues pesetes”. Valledor señaló que resulta imprescindible aclarar si les imputaciones feches por Buendía, atribuyendo a la Empresa HC Energía la másima responsabilidá nos citaos sobrecostes son ciertes o non “ya que la empresa desmintioles de manera fulminante”.

Al so xacíu les coses nun pueden quedar asina. “Si ye cierto qu'había un compromisu para permitir la utilización de la cantera d'Aboño que dempués se incumplió supón una grave irresponsabilidá que mos va suponer a todos una cantidá similar a lo que por exemplu, va costar el nuevu Hospital Central d'Asturies”. “Si pol contrariu les esplicaciones daes pol Conseyeru nun respuenden a la verdá alcontrámosnos ante un asuntu que yo calificaría de mui turbiu y del que van derivase graves responsabilidaes polítiques”. Valledor señaló que na comparecencia'l Conseyeru d'Infraestructures ésti fuí mui claru al establecer como causa fundamental de los sobrecostes l'encarecimientu nel aprovisionamientu de piedra pola falta de disponibilidá de la cantera d'Aboño, minimizando tantu l'oleaxe, al que diversos responsables políticos del entornu del gobiernu habíen atribuio inicialmente buena parte del problema, como les meyoras técniques al proyectu inicial. “Pues agora toca dilucidar si eso ye cierto o non”.

P'aclarar estos estremos el grupu parlamentariu d'Izquierda Xunida rexistró güei mesmu la solicitú de comparecencia del Presidente de HC Energía, Manuel Menéndez na Comisión d'Infraestructures de la Xunta Xeneral, xunto cola pendiente del Presidente de l'Autoridá Portuaria de Xixón, Fernando Menéndez Rexach, “pa que informe, en calidá d'interesáu y si lo tiene a bien, del desarrollu de les obres d'ampliación del Puertu del Musel, de les incidencies derivaes del so sobrecoste y de la presunta responsabilidá de la so empresa nes mesmes”.