Menu

El coordinador xeneral d'IX, Manuel González Orviz, denunció l'electoralismu nel que s'envolubren toles propuestes sobre la Variante de Payares y esixó la llegada a Asturies de l'AVE ensin que se produzan más dilaciones.

Pa Izquierda Xunida, la puesta en marcha de l'alta velocidá tien de ser aprovechada, amás, pa la coordinación d'un nuevu modelu de tresportes per ferrocarril n'Asturies que sirva pa dar respuesta a les nueves necesidaes, conectando, por aciu cercaníes, los grandes núcleos de población.

L'oxetivu, esplicó González Orviz, ye evitar que puedan producise nuevos retrasos, escudándose en nueves propuestes que nun respuenden a les necesidaes reales sinón que sirven de coartada pa xustificar nueves dilaciones, anque ensin arrenunciar a que la llegada de l'AVE suponga'l revulsivo necesariu pa una nueva concepción de les comunicaciones d'Asturies. “Naide dulda de qu'IX foi'l martiellu pilón en defensa de la conexón ferroviaria con Payares, de la plataforma ferroviaria pa la Variante de Payares, pos yá lo venimos defendiendo dende los años 90, con independencia de que'l Gobiernu estatal fora del PSOE o del PP”, señaló'l coordinador xeneral d'IX, quien apostó por superar l'atrasu de décades. “Cuando plantegábamos la Variante de Payares tábamos plantegando superar un atrasu secular en comunicación ferroviaria. Sicasí, güei, la entrada de l'AVE a Asturies tien que suponer un elementu que tien que tener en cuenta la realidá del sieglu XXI. Nun se trata de faer un trazáu ayenu a les infraestructures esistente, ayenu a les infraestructures previstu y ayeno a les necesidaes tantu pa viaxeros como pa mercancíes del conxuntu d'Asturies”.

IX va plantegar que s'estudien los impactos estructurales, de forma que s'articule una rede que dexe'l so aprovechamientu en función de los polos industriales de la rexón, por culpa de que la llínea d'alta velocidá prevese como d'usu mistu mercancíes-pasaxeros, y, tamién dende la perspectiva de la distribución de la población nel territoriu. Manuel González Orviz señaló qu'estes implicaciones nun tán contemplaes, anguaño, nel proyectu ministerial, polo que reclamó al Gobiernu d'Asturies que fale col de la Nación sobre un Plan d'Infraestructures de Movilidá n'Asturies. “Non cabo falar de movilidá n'Asturies, d'una reordenación de los medios d'Asturies, ensin tener en cuenta'l papel que nello van xugar los conceyos y la mesma comunidá autónoma, porque, en dellos casos, toos ellos son titulares de delles de les infraestructures afectaes y tamién de dalgún de los medios que tienen que poner”.

Sía que non, pa IX van ser inasumibles nuevos retrasos, al estilu de lo qu'asocedió na Autovía del Cantábricu que la so puesta en marcha dilatose demientres más de dos décades pol conflictu de trazaos ente Llanes y Unquera. Otra manera, Orviz reivindicó la necesidá del diálogu ente toles partes, al pie de la inclusión imprescindible” del insertamientu de l'AVE nun plan más ambiciosu de meyora de les cercaníes. “Esto ye, que se tenga en cuenta'l tratamientu integral de lo que ye la movilidá y de lo que ye les conexones. Vamos gastar nuna estimación d'esi 50% del presupuestu que costaría la entrada de l'AVE nel centru d'Asturies 1.100 millones d'euros. Y creo que tamos nun momentu pa gastar con cabeza”.

Nesti sentíu, Manuel González Orviz reclamó que se tenga en cuenta l'actual mapa asturianu, teniendo en cuenta desarrollo como'l de Siero o Castrillón y ensin escaecer los enllaces coles nales, por aciu una rede de tresporte que facilite la movilidá interna y esterna de la rexón. “Asturies precisa l'AVE pa viaxeros y mercancíes pero Asturies tamién precisa cercaníes, porque falamos de desenvolvimientu, pero tamién de derechos, porque la movilidá xuega un papel importante nel desenvolvimientu de la igualdá”.