Menu

La conseyera de Fomentu, Belén Fernández, amenorga los problemes de contaminación d'Avilés y sostien que ye un problema alcontráu na redolada portuaria, más concretamente na estación del Mataderu, onde viven alredor de 1.000 persones.

Asina lo manifestó na entruga qu'esta mañana formuló-y nel plenu'l diputáu d'IX, Ovidio Zapico, sobre qué midíes piensa llevar a cabu p'amenorgar la contaminación nel Puertu d'Avilés y en San Juan de Nieva. La conseyera tamién aseguró que'l   plan calidable del aire puestu en marcha n'Avilés hai más d'un añu ta funcionando y dexó ameyorar de forma progresiva los indicadores de contaminación.

Fernández afirmó que'l plan vixente dende agostu de 2014 contempla 15 midíes qu'arreyen a otres alministraciones y empreses y que tán dando resultancies positives, anque tien de ser evaluáu a finales d'anguaño y va ser nesi momentu cuando s'analice si ye necesario nueves midíes o non.   Sía que non, dixo que los datos son alentadores y que, anque nun tán dafechu satisfechos, hai una meyora. Ovidio Zapico aportunó en que'l problema “sigue ende” y Asturies sigue ocupando los primeros puestos nos informes emitíos pol Ministeriu. “Esi plan vese que ye insuficiente a les clares, los datos salten día ente día”, esplicó na Xunta Xeneral Ovidio Zapico. El diputáu d'IX abogó por  más controles, vixilancies y tamién sanciones cuando s'incumpla la lexislación en materia medioambiental. De la mesma, recordó qu'en partícules PM10 Avilés superó'l valor diariu l'añu pasáu mientres 154 díes, 151 día Gozón y 117 en Castrillón y que en dióxidu d'azufre, anque tean dientro de les llendes que la lexislación acepta, triplícase los valores que la OMS (Organización Mundial de la Salú) aconseya.

Zapico repitió l'apueste d'IX pola reindustrialización d'Asturies, pero por una industria que cumpla en materia medioambiental.