Menu

Jesús Iglesias, candidatu d'IU-BA-Verdes a la presidencia del gobiernu asturianu, firmó esta mañana cola Unión de Consumidores d'Asturies (UCE) el contratu programáticu que constituye el “Pactu pol Consumidor” y que compromete a la coalición na defensa de los derechos de los consumidores ante les alministraciones y les empreses privaess.

Jesús Iglesias, candidatu d'IU-BA-Verdes a la presidencia del gobiernu asturianu, firmó esta mañana cola Unión de Consumidores d'Asturies (UCE) el contratu programáticu que constituye el “Pactu pol Consumidor” y que compromete a la coalición na defensa de los derechos de los consumidores ante les alministraciones y les empreses privaess. Esti contratu, tal como lu definió Jesús Iglesias, ye “un pasu nel fomentu de los derechos democráticos que ufierta más garantía a los ellectores”. IUBA-Verdes ye la primer fuerza parlamentaria que incorpora esti contratu programa.

En virtú d'esti alcuerdu firmáu pol candidatu d'IU-BA-Verdes, ante Dacio Alonso, presidente de la UCE n'Asturies y José Antonio Ballesteros, miembru de Los Verdes d'Asturies, númberu 3 na llista d'IU d'Uviéu, la coalición comprométese a cumplir el siguiente decálogu:

1. La Igua d'una Conseyería de Consumu y Mediu Ambiente, pa potenciar la coordinación d'ambes polítiques y la so tresversalidá en tola aición de gobiernu.

2. La puesta en marcha d'un “Plan Estratéxicu de Proteición de los Consumidores”, de calter pluriañal, a fin de reequilibrar la so posición frente a la oferta y algamar una proteición más efectiva.

3. Incorporar al Conseyu Económicu y Social d'Asturies la representación de los consumidores y usuarios, mediante les modificaciones llegales necesaries.

4. Incorporar a los órganos de participación de les Caxes d'Ahorros la representación de los consumidores y usuarios, mediante la modificación de la correspondiente llei de Caxes.

5. Aprobación de la normativa que fixe los criterios de representatividá de les distintes asociaciones de consumidores y usuarios.

6. Igua de la “Comisión pal Siguimientu de la Aplicación de les Normes de Proteición de los Consumidores”, con participación de les asociaciones, a fin de potenciar la inspección y meyorar el control del mercáu.

7. Evaluación añal del impactu de les polítiques de consumu, con participación de les asociaciones de consumidores, a fin de valorar periódicamente la so eficacia y sacar les pertinentes conclusiones.

8. Potenciar les ayudes empobinaes a la meyor profesionalización y equipamientu tecnolóxicu de les asociaciones de consumidores y usuarios.

9. Puesta en marcha de Programes Añales de Consumu Sostenible, a fin de potenciar midíes de consumu responsable que minimicen l'impactu sobre'l mediu ambiente.

10. Puesta en marcha de Programes Añales de Comerciu Xustu, a fin de  contribuir a potenciar esta modalidad de comerciu.