Jesús Iglesias, candidatu d'IU-BA-Verdes a la presidencia del Gobiernu asturianu, y Joaquín Arce, representante de Los Verdes d'Asturies, númberu 8 de la candidatura a la circunscripción central d'Asturies a la Xunta Xeneral, presentaron el programa sobre mediu ambiente col que van concurrir a les elecciones.

Jesús Iglesias, candidatu d'IU-BA-Verdes a la presidencia del Gobiernu asturianu, y Joaquín Arce, representante de Los Verdes d'Asturius, númberu 8 de la candidatura a la circunscripción central d'Asturies a la Xunta Xeneral, presentaron el programa sobre mediu ambiente col que van concurrir a les elecciones. Por primer vez, en pallabres de Joaquín Arce, el ecoloxismu políticu ta en primer llínia de la política asturiana, como una clara alternativa que va permitir influir direutamente na mesma, ensin perder el contactu coles asociaciones ecoloxistes. Tol programa ta impregnáu de la visión d'un desarrollu sostenible y de respetu al mediu ambiente, dende les propuestes en materia fiscal, a les polítiques sanitaries, la educación, les infraestructures o la vivienda.

Jesús Iglesias, candidatu de IU-BA-Verdes a la presidencia del Gobiernu asturiano, aseguró qu'esti programa apuesta realmente por un programa sostenible y de respetu al mediu ambiente, cuando otres formaciones quedaron nuna aición nominalista plasmada nel “Asturies paraiso natural”, ensin polítiques qu'atregan el nuesu territoriu o llevando a cabu aiciones non compatibles con estos dos conceptos. El exemplu paradigmáticu ye que les polítiques de Mediu Ambiente llevénse a cabu desde la Conseyería d'Infraestructures. IU-BA-Verdes proponen la igua d'una Conseyería con competencies medioambientales qu'actúe dialéuticamente coles otres Conseyeríes asturianes y el restu de los departamentos de l'alministración.

IU-BA-Verdes comprométese a frenar la construcción del embalse de Caleao, el fornu incinerador de Cogersa y la construcción de segundes residencies na costa asturiana fomentando la especulación, cola escusa d'instalación de campos de golf, pa los que vamos demandar una moratoria.

El compromisu de nueso col mediu ambiente va desendolcase nes siguientes propuestes:

Compromisu de Progresu Sostenible

Una política enerxética sostenible

Nel marcu del cumplimientu del Protocolu de Kyoto y de llucha escontra'l cambiu climáticu y la contaminación, ye necesario cuestionar el modelu de futuru propuestu pa la especialización d'Asturies na producción y tresporte d'enerxía elléctrica cola proliferación indiscriminada de centrales de ciclu combináu. Pa evitalo, ye necesariu promover la planificación y coordinación ente los diferentes axentes qu'intervienen nel sector enerxéticu de mou que, ente otros obxetivos: quede modernizáu el sector y algamar que l'apertura de nueves centrales nun non implique namás un aumentu de la contaminación atmosférica n'Asturies, sinon que ésta baxe.

Respectu a les llínies d'alta tensión, Red Elléctrica Española habrá d'invertir en meyorar los corredores anguaño en serviciu ensin prever nueves llínies qu'atraviesen nuevos territorios antes de que s'aborde una nueva planificación enerxética asturiana que determine les nuesess necesidaes de producción enerxétiques dientro del contestu estatal.

Vamos dar puxu al aforru enerxéticu y vamos fomentare les enerxíes renovables. L'aforru y la meyora de la eficiencia enerxética de la industria, el tresporte y los hogares, tuuien que ser la mayor prioridá na política asturiana en materia d'enerxía.

El cambiu climático ye ya un fechu, pero aún pue moderase. P'algamalo vamos da-yos puxu a les actuaciones empobinaes a adaptar la economía y la sociedá asturiana a esa realidá y a les sos repercusiones. Ellaboraremos un plan al efectu, como ya ficieron otres comunidaes autónomes, nel que se cumplan les indicaciones nacionales e internacionales que deba siguir la nuesa comunidá. Tamién vamos impulsar la igua d'un organismu encargáu d'analizar y evaluar el cambiu climáticu.

Vamos a da-y puxu a la meyora de la xestión del alumbráu públicu col fin de subir la so eficiencia, baxar la contaminación lumínica y conseguir el mayor aforru enerxéticu posible.

Ellaboraremos auditoríes sobre'l consumu enerxéticu y d'agua de les alministraciones públiques del Principáu d'Asturies y vamos establecer un programa de reducción del mesmu.

Proteición del mediu ambiente

La política ambiental de la presente llexisllatura fue, nel meyor de los casos, rutinaria y pocu ambiciosa, el primer exemplo d'ello fui la decisión errónea de suprimir la Conseyería de Mediu Ambiente. Por otra parte, ensin la presencia d'IU-BA nel gobiernu hubieran producíose retrocesos irreversibles en dos de les fasteres ambientales estratéxiques: l'agua y los residuos. L'amenaza de la especulación urbanística, sobre manera sobre la nuesa costa, ye daqué que ta permanentemente nel debate públicu.

Ye la hora del mediu ambiente. La prósima llexisllatura va será con nosotros la de les polítiques ambientales nun namás porque protexer el patrimoniu ambiental de nueso ye una obligación pa coles xeneraciones futures, tamién porque l'altu valor económicu que tien el nuesu mediu natural ye imprescindible pa garantizar el desarrollu sostenible d'Asturies.

Por eso vamos a da-y puxu a les siguientes midíes:

Vamos restablecer la Conseyería de Mediu Ambiente ya que como señalamos la dependencia de les polítiques ambientales a la Conseyería d'Infraestructures demostró ser un de los fracasos más evidentes de la llexisllatura que agora fina.

Vamos poner en marcha una nueva Estratexa Asturiana de Desarrollu Sostenible qu'incluya los siguientes apartados:

Aspeutos xenerales

Consolidación, coordinación y sofitu técnicu a les Axendas 21 Llocales.

Revisión y puxu de los instrumentos de participación social, tanto nel Conseyu Rexonal de Mediu Ambiente, ampliando les sos competencies, como nos Conseyos sectoriales con conteníos ambientales. Incorporación de representantes de movimientos sociales en CADASA, COGERSA y SOGEPSA.

Supresión de la CUOTA y la su sustitución por un Institutu pal Desarrollu Urbanísticu Sostenible, en cuyu órganu rector tean los movimientos sociales, ecoloxistes y ciudadanos.

Impulsu del incrementu de los medios humanos y técnicos de la Fiscalía de Mediu Ambiente.

Igua d'una llínía d'ayudes o subvenciones específiques y convenios pal fomentu de xeres de conservación del mediu ambiente, subiendo la capacidá técnica de les asociaciones ecoloxistes pa participar nos procedimientos d'información pública.

Adhesión y aplicación de los principios de la Campaña Europea de Municipios Sostenibles.

Contratación pública con criterios medioambientales aplicando la valoración ambiental nes ofertes de contratación pública.

Aprobación de la Llei d'impactu ambiental y meyora de los mecanismos (inspección, fianzes, y otros) pa curiar el cumplimientu de las midíes correutores y demás compromisos impuestos nos estudios d'impactu ambiental.

Cumplimientu estrictu de la llegisllación sobre explotaciones de carbón a
cielu abiertu. Moratoria respecto a xeres d'altu impactu ambiental
como les esplotaciones de carbón a cielu abierto. Control rigurosu de los
procesos de restauración.

Cumplimientu estrictu de la llexisllación aplicable a canteres y dalgunes
esplotaciones mineres a cielu abiertu.

Incrementu de la representación d'organizaciones sociales (sindicatos y organizaciones ecoloxistes) na xestión medioambiental xeneral, y na xestión de los espacios naturales en particular.

Contaminación

Incrementu sustancial de les partíes presupuestaries autonómiques pa calidá ambiental, sobre manera pa vixilancia e inspección, de tal forma que al finar la prósima llexisllatura queden duplicaos los recursos esistentes nesta materia. Ampliación y meyora de la rede automática de control del aire.

Desendolcu de planes concretos pa disminuir y curiar la contaminación del aire, les agues y los suelos. Van establecese indicadores y obxetivos de baxada cuantificaos y temporalizaos.

Ellaboración d'una Llei autonómica del Ruíu.

Aprobación d'una Llei autonómica que, basándose nel principiu de prevención, regule la instalación d'antenes de telefonía móvil, tresformadores elléctricos y demás instalaciones xeneradores de campos ellectromagnéticos.

Promoción de planes de sustitución de sustancies peligroses pa la salú de les persones y el mediu ambiente nes industries radicaes nel territoriu asturianu. Potenciación de la química verde.

Xestión de Residuos

Xestión de los residuos urbanos na que se va priorizar la baxada, el reciclaxe, la reutilización y la recoyía selectiva, sobre manera de la fraición orgánica. Rechazamos la incineración como métodu central de tratamientu de los residuos.

Ellaboración d'un plan empobinau a los fabricantes y distribuidores de productos para reducir los envases.

Igua d'un programa de baxada nel usu de papel nes alministraciones públiques. Va promovese la utilización de papel recicláu o, cuando menos, llibre de cloru.

Vamos tresformar la COGERSA d'anguaño nuna empresa pública de servicios ambientales que permita collaborar colos conceyos na prestación de los servicios de limpieza y de recoyía de basures. Prestaremor-y especial atención al mantenimientu y limpieza de la rede de sendes de la Comunidá Autónoma.

Xestión del Agua

Les competencies en materia de xestión de recursos hidráulicos van transferise al Principáu d'Asturies esantes de finar el 2007.

Vamos paralizar el proyectu de construcción del embalse de Caliao, promoviendo la adaptación de la planificación hidráulica vixente a la Directiva Marcu del Agua y a los principios que surden de la Nueva Cultura del Agua como son los del aforru, xestión de la demanda, política de precios, conservación y reutilización del recursu y búsqueda de fuentes alternatives d'abastecimientu.

Encargaremos un estudiu que esamine la posibilidá de dexar fuera de serviciu la presa d'Arbón y la recuperación d'esi tramu del ríu Navia.

Aumentaremos de forma sustancial los recursos pal saneamientu en tol territoriu. Pondremos en funcionamientu les instalaciones pero non operatives. enntes del final de llexisllatura va completase el saneamientu integral d'agues en tol territoriu del Principáu d'Asturies.

Espacios Naturales y Costa

Revisaremos y desarrollaremos dafechu'l Plan d'Ordenación de los Recursos Naturales d'Asturies, que sobre la base del cumplimientu de les previsiones del Plan d'anguaño, como los Paisaxes Proteyíos de la Costa Occidental y Oriental, complete la declaración de nuevos espacios naturales n'Asturies, ente otros, los Parques Naturales de la Costa Occidental y zona Oscos-Eo, o el Monumentu Natural de la Tejeda del Sueve. Proteición específica pa los corredores ecolóxicos.

Promoveremos, en collaboración con otres alministraciones, la proteición y adecuada xestión d'espacios marinos d'altu interés ecológxcu, como El Cañón d'Avilés y el Cachucho, nos fondos marinos d'Asturies. Declaración de proteición pa les isles y el so entorno: Deva, la Erbosa y la Ladrona.

Respecto al Parque Nacional de los Picos de Europa, vamos romover, en collaboración coles Comunidaes Autónomes de Cantabria y de Castilla y León, sobre la base de la unidá ambiental y de xestión del Parque Nacional, l'aprobación d'un únicu Plan Rector d'Uso y Xestión, y d'un Plan de Desarrollu Sostenible pal ámbitu de tol Parque Nacional, con criterios uniformes para tou'l so ámbitu y evitando nueves agresiones a los sos valores naturales.

Vamos conservar les vegues de los ríos y los bosques de ribera, anguaño amenazaos pol desarrollu urbanísticu y la igua de nuevos polígonos industriales. Tien que respetase la normativa de proteición de los cauces y, evitar les actuaciones intervencionistes y pocu respetuoses con emplegu escesivu d'escolleres.

Controlaremos la utilización de les pistes forestales d'usu ganaderu y forestal impidiendo otros usos.

Vamos a curiar los espacios y les especies marines costeres. Van tomase midíes llexislatives y de xestión que garanticen la conservación de los recursos marinos y de la calidá de les agues y los espacios y especies costeros, tanto marinos como terrestres. Protexeremos en especial los espacios de la zona intermareal incluyendo una campaña de sensibilización pa la proteición de la fauna y la flora de les playes.

Impediremos la construcción de nuevos puertos deportivos, salvo que s'acredite´l so mínimu impactu ambiental.

Defensa de los animales

Modificaremos la Llei de Proteición Animal pa introducir midíes más restrictives y sancionadores acordes coles normatives mas avanzaes nesta materia, velando pol so estrictu cumplimientu, prohibiendo tolos espectáculos con tratu cruel, incluyendo les corríes de toros. Vamos desendolcar campañes y midíes de proteición y control animal, dotando de medios a los centros d'agospiu y recuperación d'animales, promoviendo y fomentando el movimientu asociativu nesta materia.

Consumu

Vamos proponer un Pactu polos Consumidores, nos términos que plantegó la Unión de Consumidores d'España n'Asturies, qu'ente otres coses prevea la puesta en marcha d'un Plan Estratéxicu de Proteición de los Consumidores, la igua d'una Comisión de Siguimientu de la aplicación de les normes de proteición a los consumidores y que faiga una evaluación añal de los impactos de les polítiques de consumu, la puesta en marcha de programes de consumu sostenible y de comerciu xustu, o la incorporación nel CES d'Asturies y Cajastur de representantes de los consumidores y usuarios.

Vamos sofitar la inclusión de les organizaciones de consumidores más representatives nel Conseyu Económicu y Social.

Vamos dotar de los recursos necesarios a les asociaciones pa que cuenten con equipos estables de profesionales.

Vamos da-yos prioridá a los programes de consumu sostenible.

Política Forestal

Vamos curiar sobre manera les manches boscoses autóctones de la rexón, especialmente de los robledales y los bosques de ribera.

 

Fomentaremos la certificación forestal pública de sostenibilidá de les producciones madereres asturianes, dando cumplimientu a lo recoyío na Llei de Montes y Ordenación Forestal del Principáu d'Asturies. Vamos da-y puxu, a que les maderes qu'utilicen les alministraciones asturianes tean certificaess como provenientes d'esplotaciones sostenibles.

Vamos meyorar los medios pa la guardería ambiental o forestal.

Evitar la expansión d'especies forestales de crecimientu rápidu, como ocalitos, promoviendo les reformes llegales necesaries qu'impidan el incrementu de la so superficie.

Vamos entamar un plan de conservación, llimpieza y puesta en valor de los cauces de los ríos y los bosques.

Vamos concentrar en un organismu de l'alministración la prevención d'incendios, la estinción y la investigación pa ser más eficaces nel tratamientu de los incendios forestales.

La ordenación de la enerxía eólica nel occidente d'Asturies.

  

Consideramos necesariu siguir apoyando'l modelu aplicáu nes últimes décades na fastera occidental d'Oscos-Eo orientáu hacia un desarrollu turísticu sostenible, ganaderu, forestal y agrícola, cola asistencia y sofitu de l'alministración pública, que significaron inversiones cuantioses públiques pero tamién privaes que fueron xeneradores d'emplegu e ingresos y estabilizadores de la población nes comarques rurales.

Los paisaxes natural y cultural tan atregaos nel marcu de los convenios (Conveniu Européu del Paisaxe, Florencia, 20 d'ochobre de 2000) y convenciones (Convención pa la Proteición del Patrimoniu Mundial d'UNESCO, París), suscritos po Gobiernu Español y que se traducen nel Plan Español pa la proteición de paisaxes culturales que supón el reconocimientu xurídicu de los mesmos, la so proteición y la participación pública a la hora de definir les midíes que-yos afecten

Nesti sen ye necesariu llimitar les xeres eóliques de xeneración elléctrica nos casos qu'estes supongan una interferencia con esti modelu de desarrollu. El incrementu de la participación de les enerxíes llimpies nel conxuntu de la producción ye un obxetivu que compartimos pero que tien que facese ensin destruir modelos de contrastada eficiencia y sostenibilidá.

 

Consideramos imprescindible, por tantu, que la decisión de nueves instalaciones parta d'una planificación racional y cuente col sofitu de los conceyos afeutados ya lo sían direutamente o por ser fronterizos.

 

Ye por ello que mos vamos a oponer, política y llegalmente, a la instalación d'aquellos parques eólicos proyectaos que xeneren un ampliu rechazu nes zones afectaes o que puedan poner en peligru'l modelu de desarrollu hasta ahora pactáu y aplicáu, spbre manera na comarca Oscos-Eo; pues el monocultivu eólicu pue xenerar una degradación paisaxística que faiga inviables dalgunes de les xeres esistentes, entr elles les rentes turístiques de les comarques, col consiguiente peligru d'acentuar la pérdida de población.

 

Por otra parte, les llíníaes de tresporte d'energxa previstes deben de trazase, si se demostrase la so necesidá, teniendo en cuenta les condiciones medioambientales y por tantu deben buscase les alternatives que menos impactu tengan, tantu nes árees llocales como nel so trazáu xeneral.