Menu

El coordinador xeneral d'IX noma d'equivocación el sofitu socialista a los populares y considera que la "gran coalición" supón alloñase de les prioridaes del pactu de investidura

El coordinador xeneral d'IX, Manuel González Orviz, anunció güei un endurecimientu del llabor de control al Gobiernu d'Asturies, tres la decisión del presidente del executivu autonómicu y de la mesma xestora del PSOE de facilitar la investidura de Mariano Rajoy. Una decisión que calificó d'equivocación. Asina, afirmó, la puerta que Javier Fernández y el PSOE abren en Madrid, Abre, tamién, n'Asturies la puerta al PP. “Non cabe la gran coalición, PP y PSOE en Madrid y falar d'un pactu d'izquierdes n'Asturies”. Y ye que, añedió, “ayer Javier Fernández y el comité federa del PSOE, ellos y solo ellos, punxeron final al entendimientu de la izquierda. Fainlo y ponenlo más difícil”.

Frente a esti xiru del PSOE pa facilitar un gobiernu del PP, IX, apostó Manuel González Orviz, tien de trabayar por llograr una mayoría de progresu que dexe ameyorar les condiciones de vida de la xente. Eso sí, matizó, “o debemos tirnosr al monte, tenemos de siguir col nuesu programa, siguir defendiendo les nueses polítiques”.

“Lliteralmente quédenme 4 díes, como coordinador, pero, non obstante, creo que tengo de salir tomando posición, pero tamién dexando claro que correspuende al futuru coordinador o coordinadora que s'escueya'l vienres y a la futura dirección que s'escueya na asamblea de payares determinar cuál va ser la estratexa que se tome nesti asuntu ”, esplicó González Orviz. pa quien el collaboracionismu de los socialistes col Partíu Popular trai, inevitablemente, un distanciamientu. “Javier Fernández, la xestora, el Comité Federal del PSOE, ayeri, cola so astención van sofitar un Gobiernu del PP en Madrid, ye dicir un Gobiernu que toos consideramos que foi lesivu pa los intereses de la mayoría”.

L'endurecimientu de la oposición d'IX ye, a xuiciu de González Orviz, la única alternativa posible, por culpa de qu'al sofitar la investidura de Rajoy, Javier Fernández y el so gobiernu tán rompiendo les sos prioridaes de investidura, ente les que citó la tresparencia, la llucha contra la esclusión social, la rexeneración, o en materia d'infraestructures. “Nun considero que vaya a ser una prioridá pal PP la llucha contra la corrupción o la rexeneración democrática; nun va ser una prioridá pa la llucha contra la probeza y l'esclusión social cuando les sos polítiques son el xerme que les xenera; nun va ser la prioridá d'esti gobiernu la tresparencia, nun va ser la prioridá del Gobiernu les infraestructures nin les distintes cuestiones qu'afecten a los intereses d'Asturies: ganadería, minería, industria, etc”.

Izquierda Xunida, aseguró González Orviz, nun va bloquiar nada, pero sí que va buscar “mayoríes” pa desenvolver un programa d'izquierda. Esto sí, repitió, la xestión de too ello va recayer sobre la nueva dirección y coordinación que va ser decidida pola militancia d'IX.