Menu

Ramón Argüelles aportuna na necesidá de xenerar puestos de trabayu y Llamazares plantega tamién la reforma fiscal como pasu imprescindible pa llograr unes cuentes pa 2017

Izquierda Xunida va caltener abiertos los calces de diálogu col Gobiernu pa la negociación del presupuestu que, según avanzó güei l'executivu autónomu, va ser llixeramente cimeru al anterior. Pal coordinador xeneral d'IX, Ramón Argüelles, les posibilidaes d'algamar alcuerdos van llegar en función de les mesmes cuentes que presente'l Gobiernu y que, na so opinión, tienen de dexar unos presupuestos que sirvan p'aplicar polítiques d'izquierda. “Que non solo sía un presupuestu de servicios sociales sinón que tamién pueda xenerar puestos de trabayu”. Nesti sentíu, esplicó que ye imprescindible compatibilizar les ayudes con inversiones granibles.

Argüelles, xuntu al voceru parlamentariu d'IX na Xunta Xeneral del Principáu, Gaspar Llamazares axuntáronse güei col presidente Javier Fernández, la Conseyera de Facienda Dolores Carcedo, y el voceru socialista nel parlamentu asturianu, Fernando Lastra, nun alcuentru que, amás del planu institucional como nuevu máximu responsable d'Izquierda Xunida d'Argüelles, sirvió pa empecipiar el procesu negociador. Nestos momentos, añedió Argüelles, va analizase qué coses son “llínees coloraes” pa IX, que, pel  momento caltien “la puerta abierta” a llograr alcuerdos.

Pela so parte, Gaspar Llamazares esplicó que les cuentes nun tán cerraes, de primeres, dixo, porque nun ye seguru'l marxe de financiamientu, qu'inda tien que ser definíu pol Conseyu de Política Fiscal y Financiera. Eso sí, indicó, “tamos ante un presupuestu llixeramente cimeru a la prórroga, y por tantu tenemos un marxe de maniobra estrechu”.

Pa IX, los pasos previos tienen de pasar por una reforma fiscal superadora del erru de saltu en sucesiones, con un modelu más progresivu y xustu, la llucha contra'l fraude y la elusión y, con unes prioridaes presupuestaries que compatibilicen el cambéu social” y l'inversión.