Menu

El coordinador federal asegura que cuanto más fuertes sían Izquierda Xunida y Podemos de forma individual más fuertes van ser les confluencies

Alberto Garzón anuncia la presentación d'una enmienda a los presupuestos del estáu pa financiar el soterramientu de Llangréu

El coordinador federal d'IX, Alberto Garzón, reconoció güei la singularidá d'Asturies nel procesu de confluencia y apostó per víes que dexen poner fin a los gobiernos de dereches na Comunidá Autónoma y nel restu d'España. El líder de la formación visitó esta mañana Llangréu onde anunció la próxima presentación d'una enmienda a los Presupuestos Xenerales del Estáu, con cuenta de qie la Alministración Central comprometese col financiamientu de les inversiones necesaries pa rematar el soterramientu del ferrocarril al so pasu por La Felguera.

Garzón, acompañáu pol coordinador xeneral d'IX Asturies, Ramón Argüelles, viaxa nestos momentos escontra La Pola L.lena, onde ta previstu que roblen un documentu pa empecipiar l'alderique sobre la fueya de ruta necesaria pa la confluencia, nel qu'igualmente se reconocen les singularidaes asturianes, según la fortaleza de la organización que, enfatizó Garzón, llogró los meyores resultaos d'España nes pasaes elecciones municipales y autonómiques.

Ramón Argüelles destacó que l'oxetivu d'IX Asturies tien de ser buscar aliances pa un cambéu nes polítiques.

En clave asturiana, Gazón esplicó que'l maltratu presupuestariu del Estáu a la Comunidá Autónoma inscribise nel maltratu a les clases trabayadores, consecuencia de les polítiques neolliberales del PP y que yá empecipiara al PSOE, que, recordó, foi tamién participe na investidura de Mariano Rajoy. A mayores, les posiciones de Foru y PP en proyectos como'l de la variante de Payares suponen decisiones tomaes non cola lóxica de lo que se precisa sinón de lo que denominó "cambéu de cromos". Una situación, la de la variante, de la que nun esculpó al PSOE una y bones recordó que'l presidente d'Asturies, Javier Fernández, ye de la mesma presidente de la xestora socialista que dio'l gobiernu al PP en Moncloa.

Na visita a Llangréu, Garzón condergó l'últimu ataque norteamericanu en Siria y pidió a Donald Trump qu'entienda que nun ye'l "sheriff del planeta".