Menu

La iniciativa d'IX foi sofitada por PSOE, Podemos y Ciudadanos

El parlamentu asturianu esixe al Gobiernu central un anchu de vía pa la Variante de Payares que dexe'l pasu de los trenes de mercancíes pa la so conexón col corredor Atlánticu y una medría inmediata de los presupuestos pa l'apertura nel menor tiempu posible. La iniciativa d'IX llogró los votos de tolos partíos, sacante los de la derecha, PP y Foro. Ovidio Zapico, diputáu d'IX, defensor de la moción subsiguiente alvirtió que lo que “Asturies precisa ye que tanto pasaxeros como mercancíes puedan circular pola Variante con seguridá”. Lo contario sería condergar a les mercancíes, por ganar 5 ó 6 minutos a los pasaxeros, a siguir fondiaes nel sieglu XIX. Fundamental pa la industria pesao como Arcelor o'l futuru del Puertu d'El Musel ye qu'estes mercancíes tean en dos hores en Vienta de Baños pa enllazar col corredor Atlánticu, aseguró'l diputáu d'IX.

Fixo referencia'l diputáu a la última noticia conocida ayeri per parte de la Conseyería d'Infraestructures dempués d'una xunta en Madrid col Secretariu d'Infraestructures, que supon un nuevu retrasu pa l'apertura siquier en 2021, una burlla pa la nuesa comunidá autónoma, pa la sociedá asturiana nel so conxuntu”.

La iniciativa aprobada, con 30 votos a favor y 13 en contra, ye la siguiente:

1) La Xunta Xeneral del Principáu encamienta al Conseyu de Gobiernu a lliderar una defensa firme ante'l Gobiernu central d'un anchu de vía na variante ferroviaria de Payares que dexe una conexón fluyío y seguro de los nuesos trenes de mercancíes col Corredor Atlánticu "Aveiro-Hendaya".

2) La Xunta Xeneral del Principáu encamienta al Conseyu de Gobiernu a esixir ante'l Gobiernu central la medría inmediata de la cuantía reflexada nos Presupuestos Xenerales del Estáu pa les infraestructures asturianes, y n'especial pa la variante ferroviaria de Payares, con cuenta de garantizar nel menor plazu de tiempu técnicamente posible, l'apertura de la variante.

3) La Xunta Xeneral del Principáu encamienta al Conseyu de Gobiernu a reclamar ante'l Gobiernu central l'adopción de les decisiones que garanticen el financiamientu comuñal, tantu na conexón col Corredor Atlánticu, como no relativo a la execución de la variante ferroviaria.

4) La Xunta Xeneral del Principáu encamienta al Conseyu de Gobiernu a crear una comisión técnica pal siguimientu del desenvolvimientu del proyectu y la execución de la obra pa garantizar la circulación de los nuesos trenes de mercancíes pola variante de Payares y la so conexón al Corredor Atlánticu.