Menu

Presidencia contesta a Concha Masa que tamién va caltener l'emplegu públicu rellacionáu colos rexistros civiles

El Principáu va caltener toles oficines del rexistru civil esistentes na actualidá. Asina respuende la conseyería de Presidencia y Participación Ciudadana a les entrugues de la diputada d'IX, Concha Masa, esmolecida pol caltenimientu n'Asturies de los rexistros civiles cuidao que la entrada a valir de la Llei 20/2011, de 21 de xunetu, podría suponer la so privatización y que na comunidá autónoma solo quedaren un númberu máximu de seis frente a la situación actual na que cada conceyu de más de 7.000 habitantes tien una oficina de rexistru. Guillermo Martínez, conseyeru de Presidencia, sostien énte les entrugues d'IX, que si la reforma propuesta pol Ministeriu de Xusticia sale adelantre, va ser el Principáu d'Asturies el competente pa decidir cuántes oficines del rexistru civil queden en funcionamientu y que, la previsión, ye “caltener toes y cada una de les esistentes na actualidá”.

Concha Masa, diputada d'IX na Xunta Xeneral, realizó esta y otres entrugues sobro xusticia dempués d'axuntase a finales de marzu cola sección sindical de CCOO de Xusticia. Masa tamién entrugó al Gobiernu sobro'l caltenimientu de los emplegos. Nesti sentíu Martínez respuende que la previsión del Principáu “ye caltener a los mesmos funcionarios qu'empresten serviciu nos rexistros civiles a día de güei, calteniendo l'emplegu públicu rellacionáu col rexistru civil, colos Lletraos de l'alministración de Xusticia como encargaos de los mesmos y col personal de l'alministración de Xusticia destináu en diches oficines, “reconociendo asina l'eficaz llabor d'estos funcionarios”. La entrada a valir de la Llei 20/2011 nel mes de xunetu nun va suponer costu dalgunu, en principiu, pa les arques del Principáu, cuidando que se trata de caltener la situación actual, sostien na so respuesta escrita a la entruga d'IX de qué costu tendría l'aplicación de la mentada normativa. Sicasí, el Gobiernu asturianu diz que, solicitó al Ministeriu que s'incluya dientro del cambéu de la Llei'l compromisu de que la reforma aludida nun traiga medría de gastu pa les comunidaes na doble aguada de gastos de personal y de medios tecnolóxicos y materiales nos desenvolvimientos de programes y sistemes esixíos na nueva llei.

La diputada d'IX tamién preguntó cuálos son les razones poles que nun se solucionaron los problemes de interoperabilidad y otres dificultaes técniques ente les oficines del rexistru civil y el Sespa no que se refier al rexistru de nacencies y cuándo se tien previstu solucionalos. Nesti casu, l'executivu asturianu sostien que los problemes de interoperabilidá tienen de ser solucionaos directamente pol Ministeriu de Xusticia yá que d'él dependen l'aplicación informática INFOREG encargada de la xestión de les inscripciones. El Principáu, sostien el conseyeru, que dio treslláu a la Dirección Xeneral de los Rexistros y del Notariado del Ministeriu de Xusticia sobro los problemes que lu comunicaron.