Menu

Ovidio Zapico sostien que'l caos na Y ye una falta a Asturies

El coordinador xeneral d'IX Asturies, Ramón Argüelles, esixó güei una postura “más activa y batallosa” na defensa de los intereses de los asturianos per parte del presidente asturianu, Javier Fernández, na defensa de l'Alianza Político y Social poles Infraestructures yá que los Presupuestos Xenerales del Estáu “evidencien la nula voluntá d'invertir na rexón”.

Argüelles fixo estes declaraciones nuna rueda de prensa xuntu al diputáu autonómicu Ovidio Zapico y Gaspar Llamazares, voceru parlamentariu na Xunta Xeneral. El coordinador xeneral llamentó que les infraestructures sían noticia n'Asturies, como ye'l casu de la Y, por culpa de la inoperancia política”, y alvirtió que los Presupuestos Xenerales del Estáu son “entá peores que los del añu pasáu pa la rexón”. IX recordó que foi la única fuerza político que robló'l pactu social poles infraestructures cola esperanza de que les reivindicaciones que recueye fueren atendíes nos presupuestos. “N'otros llaos, como nel País Vascu tocó-yos el gordu y equí nun llega nin la pedrea”, dixo Argüelles pa pidir una postura más activa al Gobiernu rexonal, yá que a la so manera de ver, les pretensiones del Principáu nun cunten “pa nada”, y nun entiende que se dexe gobernar al PP de Mariano Rajoy nestes condiciones.

Ovidio Zapico, responsable d'Infraestructures nel grupu parlamentariu d'IX, adelantró que la coalición rexistró xuna entruga per escritu pa conocer cuáles fueron les xestiones y les resultancies que'l Gobiernu asturianu llogró tres dos meses de la firma de l'Alianza poles Infraestructures, sobremanera teniendo en cuenta los recién aprobaos presupuestos xenerales del estáu que premiaron al País Vascu y a Canaries. “Non solo nun consiguimos los oxetivos marcaos na Alianza sinón qu'obres como les que se faen na Y son una falta a la comunidá autónoma”, esplicó na Xunta Xeneral. Al so xuiciu coles obres metanes la selmana na Y antepónense los intereses de la empresa a les de les necesidaes de la población asturiana. “Fixéronse ensin nengún miramientu pa los asturianos, tendríen d'afaer la obra a les necesidaes de la población y posiblemente faer los trabayos en fin de selmana”, esplicó. Zapico recordó que l'enllaz de Carbayeda figura na Alianza Político y Social, que reivindica les infraestructures estatales rimaes na rexón y que dempués de munchos años con un estudiu realizáu nun s'executó nada. Esti enllaz y el de Parés ensin incluyir na Alianza- seríen al so xuiciu importantes pa evitar que la Y conviértase nuna ratonera.

Zapico repitió'l pidimientu de dimisión del delegáu del Gobiernu, Gabino de Lorenzo, y del responsable de la Demarcación de Carreteres del Estáu d'Asturies. Pa esti postreru, recordó, tamién pidió la comparecencia nuna comisión de la Xunta Xeneral.