Menu

La ineficaz xestión del equipu de Gobiernu esplica una iniciativa pa poner fin al abandonu del conceyu

Izquierda Xunida d'Asturies sofita de "forma absoluta” la moción de censura encabezada por Maximino García en Morcín ya impulsada por trés fuerces polítiques del conceyu, énte'l paralís del Gobiernu municipal. El secretariu d'organización d'IX Asturies, Alejandro Suárez, aseguró güei que la ineficacia de la xestión de Jesús Álvarez Barbao asitió al conceyu nuna situación crítica insostenible demientres más tiempu.

Izquierda Xunida d'Asturies considera xuna bien bona noticia esta moción de censura de la esquierda en Morcín porque se van a poner fin a dos años d'esbarrumbe y de falta de xestión, sobremanera en proyectos amestaos al empléu como ye'l polígonu d'Argame y, a cencielles, vamos sofitar al futuru alcalde d'Izquierda Xunida y vamos demostrar, nestos dos años, que pueden camudase les coses y que los vecinos van tener meyores servicios y meyores inversiones”, aprofió'l secretariu d'Organización.

La moción, esplicó Suárez, nun ye de Mino, sinón de trés fuerces polítiques y plantégase como única alternativa a dos años de parón total, que se suman a la mala alministración municipal de llexislatures anteriores. Sía que non, Barbao, a xuiciu del responsable autonómicu d'IX, nun tien que sosprendese de que'l fin del so gobiernu llegue per esta vía porque recordó, él mesmu algamó l'Alcaldía por una moción de censura.

Sía que non, Alejandro Suárez fizo un llamamientu al PSOE al aselu, a la tranquilidá y a aceptar democráticamente los votos y les mayoríes”.

Y ye que, namái los llíos de Argame bastaríen pa xustificar la moción de censura. Según esplicó la secretaria de Política Municipal, Gabriela Álvarez, quien recordó que no que ye la principal zona d'actividá económica de Morcín dexáronse actividaes fora de la área pero aprovechándose de les sos infraestructures en terrenes d'especial protección, o'l zarru en terrén públicu de parceles privaes.

La nefasta xestión del equipu de Barbao mídese tamién na fallida inversión de más 1 millón d'euros nes vieyes instalaciones del pozu Monsacro, pa un muséu de la llechería y que güei ta perdíu: l'edificiu sigue ensin ser de titularidá municipal, nun se pagó'l IVA y tolos recursos gastaos son güei poco menos que ferruñu y escombru, nunes instalaciones nunca ocupaes tres les obres y machucaes pol vandalismu.

Nada funcionó sol cayáu de mandu de Barbao que mintió sobro proyectos en carreteres o que cargó a les cuentes del conceyu 550.000 euros d'inversión n'instalaciones deportives en Santolaya que tendríen de salir a costu cero pal Conceyu, como proyectu financiable por Fondos Mineros.

El PSOE de Morcín demostró una total ineptitú que nin siquier les viñetes d'un comic pueden azorronar. Si'l pueblu de Morcín tuviera que diseñar una tira risible pa esplicar la xestión de Barbao, ensin dulda, coincidieron Alejandro Suárez y Gabriela Álvarez, taríamos frente a daqué según Pepe Gotera y Otilio…”.