Menu

Ovidio Zapico y l'Asociación de Kellys Unión Asturies reprochen al Principáu que nun fixera un res para dar cumplimientu al mandatu de la Xunta Xeneral p'ameyorar les condiciones llaborales de les llimpiadores de hotel

Ovidio Zapico denunció güei la precariedá llaboral nel sector turísticu que so crecedera non se fizo acompañada d'una meyora de les condiciones d'emplegu. Ello ye qu'afirmó'l diputáu, el sector va cerrar l'añu con una crecedera d'actividá pero non con meyores salarios, y eso a pesar de que se va superar, n'importancia, el 10 per cientu del Productu Interior Brutu (PIB). “Tamos asistiendo a unu de los meyores branos nos últimos años, tocantes a los datos de turismu refiérense, un sector puxante que, ensin dulda, va llegar a final d'añu con unos bonos datos en cuanto al númberu de visitantes”.

Tou esa crecedera rexistrada, reprochó'l parllamentariu, nun repercute na meyora de los contratos de les plantiyes de la hostelería y la hotelería asturiana. “Básase la crecedera del turismu na nuesa Comunidá Autónoma na precariedá llaboral y eso ye daqué que para IX ye inaceptable”.

Zapico, qu'ufiertó una rueda de prensa al pie de les máximes responsables de l'Asociación de Kellys Unión Asturies –colectivu qu'arrexunta a les camareres d'hotel-, recordó qu'IX presentara hai más d'añu una proposición non de llei que llogró aprobar col respaldu del PSOE y de Podemos Asturies pero que, sicasí, el Gobiernu rexonal nun fixo nada para cumplir col mandatu de la cámara.

Pal diputáu, a pesar de que la reforma llaboral contribuyó de forma clara na precarización del sector, nun basta escudase nesa normativa: “hai cuestiones que dende Asturies, dende'l Gobiernu asturianu, dende inspección llaboral, tamién dende salú llaboral pueden faese p'ameyorar les condiciones llaboral y salarial de les camareres de pisu”.

Ovidio Zapico señaló que'l presidente, Javier Fernández, entá ayeri, pidía n'Avilés a los sindicatos un emburrie pa lluchar contra la discriminación salarial: “güei, esi mesmu emburrie, IX pideilu a él (en referencia al xefe del executivu autónomu) pa trabayar contra la discriminación de les camareres de pisu”.

La tesorera de les kellys Unión Asturies, Ana Núñez llamentó qu'a pesar de que la propuesta aprobada pola Xunta Xeneral yera, sobre'l papel, “bien bona”, el Gobiernu nun fixo nada p'ameyorar les condiciones llaborales del colectivu. “Y esto ye lo murnio”, dixo: “cuando podíamos ser un pocu pioneros, porque IX recoyó prácticamente toles reivindicaciones que Kellys Unión Asturies plantegara, resulta que se queda nel papel y nun se fai nada”.

La responsabilidá del Gobiernu asturianu ye clara a xuiciu de les Kellys Unión Asturies. “Nun me sirve qu'el nuesu presidente diga que ye qu'esto depende del Gobiernu del Estáu: non, hai coses que nun dependen, por casu l'Institutu Asturianu de la Salú podía perfectamente faer un estudiu de cuálos son les enfermedaes profesionales de les camareres de pisu”, espetó Núñez, pa quien ye imprescindible reconocer qu'esisten patoloxíes que son consideraes comunes cuando, nel so colectivu, son consecuencia directa de l'actividá profesional.