Menu

La eurodiputada d'IX esixe que'l compromisu del Parlamentu Européu tres les informaciones sobro agresiones sexuales nun se quede namái “en declaraciones y xuna resolvimientu”, sinón que s'encete'l problema como un componente más de la violencia estructural sobro les muyeres.

La eurodiputada d'Izquierda Xunida Ángela Vallina reclamó esti miércoles a la UE que ponga en marcha una Directiva sobro violencia de xéneru por que les denuncies por acosu sexual nes instituciones comuñales qu'apaecieron esta selmana en diverses informaciones periodístiques nun se cierren en falsu con un alderique nel Parlamentu Européu y un resolvimientu.

Eses informaciones, apuntó Vallina, “definen esta institución como un pebidal d'acosu sexual” y, quiciabes, “a dalgunos pillarálos por sorpresa”, pero “la mayoría de les muyeres sabemos de lo que se ta falando, porque ye un secretu a voces”.

La Eurocámara celebraba esti miércoles n'Estrasburgo un alderique sobre acosu sexual marcáu poles informaciones publicaes nuna web de noticies que faíen referencia a una trentena de denuncies de violación per parte de trabayadores de la institución. La mayor parte de les víctimes espresaba en dichu artículu la dificultá pa denunciar, la falta d'información y la esistencia d'una especie de “cultura del silenciu” en redol a esta tema.

Vallina, qu'empezó'l so discursu con un agradecimientu a les persones que “dieron el pasu de denunciar” y a la recién campaña YoTamién - qu'arriendes de les denuncies públiques de numberoses actrices de Hollywood contra'l productor Harvey Weinstein sirvió pa visibilizar ya identificar les constantes práctiques d'acoso sexual que sufren les muyeres en tol mundu-, señaló, sicasí, que l'alderique nun puede cerrase con “una serie de declaraciones güei, votar un resolvimientu mañana y escaecenos de la tema”.

“Por eso encamentamos de nuevu a la Comisión Europea a proponer una Directiva pa combatir la violencia contra les muyeres, y a tolos Estaos miembros a ratificar ya implementar el conveniu d'Istambul”, apuntó.

La eurodiputada, amás, remató la so intervención alvirtiendo de que “la mayoría de casos nun son denunciaos por mieu al estigma social y tamién por mieu a perder el puestu de trabayu”, y pidió que s'introduzan meyores nos mecanismos de detección y denuncia de los casos na Eurocámara.

“Nesti Parlamentu esiste un comité que da siguimientu a les denuncies d'acoso entre asesores y eurodiputaos”, pero la realidá “ye que la mayor parte d'esi comité componse d’eurodiputaos y non eurodiputaes, por eso'l mieu a denunciar per parte de les víctimes”.