Menu

Argüelles alvierte: anque haya garantía de recolocación de plantiya compromete emplegu futuru

Izquierda Xunida reclama que l'Estáu pilote un modelu enerxéticu nacional empobináu a dar rempuesta a les necesidaes del país y non basáu nos intereses de les eléctriques

El coordinador xeneral d’IX Asturies, Ramón Argüelles, esixó güei un compromisu claru pala reindustrialización de les cuenques mineres, según un modelu enerxéticu nacional basáu nes necesidaes del país y non de los intereses de les eléctriques. Argüelles refugó'l zarru de la central térmica de Lada, al considerar que, por más que se garantice la recolocación de la plantiya, esta midida va tener un impactu negativu para l'emplegu nel futuru. "Esiximos, al Gobiernu del Estáu y tamién al d'Asturies un plan inmediatu para la industrialización de les Cuenques Mineres, dando respuesta a los alcuerdos incumplíos y con carga presupuestaria pa 2018", enfatizó’l máximu responsable d'IX. Amás, reclamó un allugamientu claru del gobiernu d'Asturies y rempuestes a un modelu enerxéticu claru, xustu y racional tantu dende perspectives puramente de xestión de la enerxía como económiques y sociales y medioambientales".

Pa Argüelles, el modelu enerxéticu tien de plantegase teniendo en cuenta a les poblaciones que se vaigan a ver afectaes pola so puesta en marcha, garantizando, sía que non la seguridá enerxética ensin arrenunciar, mientres se quema carbón, al usu del mineral autóctonu que, al so xuiciu, tien de formar parte de la reserva estratéxica nacional.

Nestos momentos, aseguró'l coordinador xeneral d'Izquierda Xunida, "el Gobiernu del estáu tien d'asumir el pilotaxe nel diseñu d'un modelu enerxéticu basáu nes necesidaes reales del pais y non en función de los interés de les eléctriques, tal y asocede agora col zarru de Lada, que solo s'entiende poles mesmes necesidaes ya intereses de la empresa y non por una sensibilidá medioambiental so la que trata de xustificar esta midida".