Menu

La eurodiputada d'IX reclama na comisión de Desenvolvimientu Rexonal una política d'infraestructures de tresporte más sostenible y con participación directa de los entes locales, rexonales y de la ciudadanía, de la que denuncia que'l plan Juncker' dexe a les empreses privaes recuperar la so inversión con dineru público cuando'l negociu va-yos mal.

La eurodiputada d'Izquierda Xunida Ángela Vallina reclamó esta mañana na comisión de Desenvolvimientu Rexonal de la Eurocámara una política d'infraestructures pal tresporte más sostenible, que tenga en cuenta les necesidaes reales de los entes local y rexonal y que nun tea empobinada al negociu d'un sector priváu que, cuando les coses van-y mal, tien la opción de reclamar un rescate con dineru público como lo vivío nel Estáu español coles autopistes. La parllamentaria fixo especial fincapié na importancia del ferrocarril como elementu de cohesión social y territorial, y denunció l'enfotu por construyir más y más infraestructures, ente que nun se tán aprovechando les que yá hai.

Nun alderique sobro l'informe que va ellaborar el Parlamentu Européu al respective de les polítiques de cohesión y tresporte sostenible, Vallina reivindicó "la importancia especial" que tien el promover el tresporte públicu de viaxeros y señaló que la UE tendría de poner "énfasis nel ferrocarril, tantu pal tresporte de mercancíes, como'l de pasaxeros" cuidao que "ye'l mediu más sostenible y menos contaminante".

"Gustaríame que s'emprestara especial atención a les llínees de ferrocarril abandonaes pol potencial que tienen en cuanto al caltenimientu de la cohesión social y territorial, y pa lluchar contra la despoblación", esplicó.

Ello ye que el ferrocarril, na so opinión, ye l'apueste más coherente "si queremos tener una política d'infraestructures de tresporte que cumpla colos oxetivos climáticu y enerxéticu de la UE y los alcuerdos de la COP 21".

Vallina cree qu'enagora nun se ta faciendo "una reflexón global sobro'l modelu socioeconómicu imperante de globalización, competitividá, Mercáu Únicu y necesidá de medría constante d'infraestructures". Y preguntóse por qué "antes d'asumir que precisamos más infraestructures o aumentar les sos capacidaes, por enforma que sían sostenibles, nun s'introducen cambeos que dexen amenorgar la dependencia, precisamente, d'eses infraestructures".

"Falo d'un modelu económicu más descentralizáu y equilibráu qu'evite l'enorme tresporte de mercancíes y trabayadores, Una ordenación territorial qu'amenorgue la fienda ente les ciudaes y el mundu rural, según les tensiones ente poblaciones d'unes zones y despoblación d'otres", comentó.

La eurodiputada d'IX criticó los abusos que se tán produciendo col Fondu d'Inversiones Estratéxiques de la UE, conocíu como plan Juncker, por dexar que "determinaos entes privaos arriesguen el so dineru pa faer negociu y en casu de qu'esi negociu nun funcionaar, vaigamos detrás pa cubrir les perdes con dineru público".

"A mi paezme necesariu que se movilicen fondos privaos, non yá públicos, pero non a mariña del dineru de la ciudadanía. N'España emplegáronse más de 2.000 millones d'euros en rescatar autopistes que se fixeren con fondos privaos y qu'agora tien que pagar la ciudadanía", denunció.

Esos fondos "tienen de dar más importancia al tresporte sostenible y d'eleváu valor social y ambiental, facilitando una elevada participación de la ciudadanía en tomar de decisiones" ya incluyendo "la participación directa de los entes local y rexonal", lo que facilitaría "que les infraestructures fueren oxetu d'un verdaderu alderique social, d'estudiu de necesidá real, de la so rentabilidá económico y social y del impactu medioambiental".