Menu

Llamazares considera que tienen de ser compatibles los alcuerdos sobro cambéu climáticu con una transición enerxética que n'Asturies nun ponga en riesgu al sector del carbón, les térmiques y al electrointensivu

Gaspar Llamazares, voceru parlamentariu d'IX na Xunta Xeneral, adelantró les temes qu'esta selmana va llevar al plenu del Parlamentu, fundamentalmente la situación del sector de la enerxía y el carbón na comunidá autónoma. Llamazares considera qu'esti ye la tema de la selmana n'Asturies por culpa de que la Comisión técnica nomada pol PP va emitir un informe güei sobro la transición enerxética. Llamazares, que va preguntar al Conseyeru d'Industria y nun refuga faelo al Presidente, recuerda qu'esa transición enerxética tien que ser compatible fundamentalmente colos alcuerdos sobro cambéu climáticu pero tamién col sector enerxéticu ya industrial d'Asturies, “porque si nun fuera asina taríen en riesgu”. Llamazares alvirtió que taría en riesgu'l sector enerxéticu del carbón y les centrales térmiques y tamién el sector electrointensivu, Arcelor y el conxuntu de les empreses industriales más importantes.

Amás d'esti asuntu IX va preguntar al Gobiernu qué opinión tien sobro la comunicación adoptada pola Comisión Europea'l 24 de payares de 2017 titulada “El futuru de l'alimentación y l'agricultura. En pos d'una agricultura común flexible, equitativa y sostenible” nel que s'apunten les llínees maestres de la nueva PAC. De la mesma, va defender xuna Proposición Non de Llei d'integración, tres la oportuna negociación colectiva, nel ámbitu de l'alministración pública y el so sector públicu autonómicu, la categoría profesional de Técnicu d'Integración Social pa garantizar l'atención especializada y calidable .