Menu

El coordinador federal d'Izquierda Xunida, Alberto Garzón, aportunó'l sábadu en Llangréu en que los cambeos organizativos na Federación d'Asturies van ser, sía que non, decidíos pola militancia asturiana. L'autonomía político y económico, dixo, ta asegurada.

L'actu sobro converxencia y confluencia que se celebraba en Llangréu sirvió amás por que'l líder d'IX Federal apostara por fortalecer aliances estratéxiques que torguen que'l diseñu del nuevu país sía realizáu pola derecha del Partíu Popular y Mariano Rajoy y de Ciudadanos y Albert Rivera. Ye imprescindible desbancar a la derecha si quier construyise un país más xustu, solidariu, feminista, y de progresu.

A entrugues de los medios, Alberto Garzón refugó enxuiciar decisiones personales, en referencia a l'alquisición per parte de Pablo Iglesias d'un xalé de luxu na Sierra Norte madrilana, al igual que nun lo fixo nos casos d'otros dirixentes políticos de partíos como'l de Ciudadanos o del Partíu Popular.

Pa terminar, Garzón señaló que la elección de Quim Torra como presidente de Cataluña nun paez al so xuiciu que facilite una solución pal conflictu que, al so xuiciu, rique diálogu frente a soluciones puramente alministratives o xudiciales como les que defende Ciudadanos.

Pela so parte, el Coordinador xeneral d’IX Asturies, Ramon Argüelles, señaló qu'Alberto Garzón foi claru y contundente en reafitar la soberanía, l'autonomía, y la capacidá de decisión de la militancia d'IX Asturies pal so futuru.

Per otru llau, a entrugues de los medios, sobro EDP, col anunciu d'una posible alquisición por un consorciu chinu de titularidá pública, Argüelles señaló que ye imprescindible garantizar el futuru de les plantes térmiques asturianes como parte del mix enerxéticu nacional, cola quema de carbón autóctono ente que esti mineral sía utilizáu como combustible. Ta claro, esplicó Ramon Argüelles, que ye necesario dir escontra un modelu d'emisiones cero, pero na so opinión ye imprescindible qu'esa transición faigase de manera ordenada y xusta palos territorios que más se van a ver afectaos por esi cambéu de modelu.