Menu

La Proposición Non de Llei aprobada por unanimidá reclama, ente otres coses, la reconocencia como enfermedá incapacitante

Por unanimidá. Tolos grupos parlamentarios de la Xunta Xeneral sofitaron esta mañana la Proposición Non de Llei d'IX que solicita importantes meyores pa los y les enfermes de Fibromialxia y Fatiga Crónica. El testu aprobáu güei, redactáu cola collaboración de l'Asociación d'Enfermos de Fibromialxia y Fatiga Crónica del Principáu d'Asturies, demanda la reconocencia como enfermedá incapacitante y pal llogru del grau de discapacidá, l'aumentu del financiamientu de la investigación y del asociacionismo y la implementación d'un protocolu d'atención integral a les persones, avanzando na formación d'equipos multidisciplinares d'atención y garantizando la continuación asistencial ente primaria y especializada, ente otres cuestiones.

Marta Pulgar, diputada d'IX, recordó que yá fueron aprobaes dos declaraciones institucionales nesta comunidá autónoma y con esta Proposición Non de Llei, espera qu'Asturies s'asitie al nivel d'otres comunidaes que como la Catalana que tán a años lluz na atención y protocolos qu'empresten a estos enfermos, alredor de 28.000 n'Asturies, un 98% d'ellos muyeres.

La Proposición Non de Llei contien dos partes, una d'elles qu'atañe a les competencies autonómiques y otra a les estatales. Tocantes a les autonómiques, demanda un protocolu d'atención integral a les persones enfermes de Fibromialxia y Fatiga Crónica dientro de la rede d'asistencia sanitaria asturiana, que'l so oxetivu ye avanzar na formación d'equipos multidisciplinares d'atención y onde quede garantizada la continuidá asistencial ente los niveles hospitalariu y d'atención primaria, y siguir apostando de manera decisiva pola investigación fomentando la formación de grupos d'investigación, introduciendo la perspectiva de xéneru y l'analís de sexu como variables y l'aumentu de financiamientu y collaboración de les asociaciones por que puedan siguir emprestando la imprescindible asistencia complementaria (psicólogos, fisioterapeutes, etc.) a les persones afectaes col menor costu posible pa elles.

Per otru llau, al respective de les competencies estatales la Proposición Non de Llei encamienta al Gobiernu de la nación a: empecipiar les acciones necesaries pa la reconocencia como enfermedá incapacitante de calter temporal o permanente nos sos distintos graos, pa la calificación y reconocencia del derechu a les prestaciones económiques contributives y non contributives ya incorporala como enfermedá nes valoraciones pal llogru del grau de discapacidá. Tamién se demanda aumentar el financiamientu necesariu pa impulsar proyectos d'investigación y retomar y ampliar, cuanto antes, l'ayuda y collaboración económica a les entidaes pa contribuyir a desenvolver programes y proyectos que redunden na calidá de vida.