Menu

Reclama a la FSA qu'abandone'l so silenciu sobro les infraestructures y la política enerxética

Aurelio Martín va proponer nel Conceyu de Xixón que se cumpla el conveniu de Xixón al Norte yá robláu

Gaspar Llamazares, voceru parlamentariu d'IX na Xunta Xeneral, acusó esta mañana al Gobiernu central de tar marxinando a Asturies nes sos polítiques d'infraestructures tres la resultancia de la visita del Secretariu Xeneral de Fomentu a la comunidá. A xuiciu de Llamazares ye un fechu pergrave que José Javier Izquierdo venga a Xixón a impugnar el Plan de Víes, conveniu axustáu poles trés alministraciones, y aventatu al Conceyu de Xixón y al Gobiernu autonómicu, esti postreru teóricamente del mesmu partíu políticu. El Gobiernu de Pedro Sánchez, como aseguró Llamazares, nin asume los compromisos anteriores nin afita calendarios pa otres infraestructures como la Variante de Payares o'l plan de cercaníes o l'autopista del mar. Nesti sentíu demandó al Executivu autonómicu de Javier Fernández que dexe d'asitiase de perfil y asuma que tien que defender a los asturianos y esixir les grandes infraestructures pindies n'Asturies. Tamién pidió a la FSA qu'abandone'l so silenciu si quieren encarar en bones condiciones la campaña del próximu añu tantu nesti asuntu de les infraestructures como na política enerxética, onde yá ye xuegu xugáu.

Llamazares realizó un allugamientu al Gobiernu central por que rectifique l'abandonu al que somete a Asturies ya incorpore estes prioridaes al presupuestu. Al pie d’Aurelio Martín, voceru d'IX nel Conceyu de Xixón, el voceru parlamentariu reclamó al Gobiernu asturianu que camude la pasividá pola esixencia, dempués de llograr calabaza tres calabaza poniéndose de perfil, pa defender el futuru d'Asturies y convoque, de manera inmediata, l'Alianza poles Infraestructures, pa tener una posición sofitada frente al Executivu de Pedro Sánchez. Llamazares nun refugó qu'Asturies tenga qu'incorporase a les movilizaciones tal como ta asocediendo en Castiella y Llión poles sos cercanía. “Si estes infraestructures nun s'incorporen a los presupuestos de 2019, como son la culminación de la Variante de Payares, el Plan de Víes y el de cercaníes, pue ser demasiao tarde pa la nuesa industria y les nueses infraestructures”, señaló. En referencia a Xixón alvirtió que cargase” el Plan de Víes convierte en papel moyáu la meyora de les Cercaníes Ferroviaries, en riesgu d'esbarrumbe.

Aurelio Martín, que recordó qu’Asturies y Xixón yá tán bien escarmaes polos incumplimientos de plazos nes obres importantes, por casu 25 años pa l'autovía del Cantábricu, alvirtió de la importancia vital pal desenvolvimientu económicu de Xixón y Asturies el Plan de Víes de la ciudá, y pal desenvolvimientu de la zona central y el medioambiente. “La Ministra Riberu propónnos una descarbonización express pero escaezse de que'l tresporte priváu ye'l responsable del 50% de la contaminación”, dixo Martín, quien abogó pol tresporte públicu y ferroviariu. Pa Martín ye una “chancia de mal gustu” que nun asuntu onde hai consensu ente les trés alministraciones implicaes, venga una de les partes y pida faer nuevos estudios que, al so xuiciu, son el preámbulu de la paralización de les inversiones y les obres”.

“Na midida que nós podamos nun lo vamos tolerar”, dixo Martín na sala de prensa del Conceyu antes d'anunciar iniciatives institucionales y d'adelantrar qu'IX sumarase a les movilizaciones que se convoquen. Martín tamién reclamó la visita del Ministru de Fomentu a Asturies, al que dixo que “cuando un Ministru nun visita en cuatro meses una comunidá ye qu'esta nun ta na so llista de prioridaes”.

Nel planu municipal IX va presentar pal próximu plenu municipal una proposición d'alcuerdu sobro'l conveniu de Xixón al Norte nel que s'encamienta al Ministru de Fomentu a unviar al Conseyu de Ministros primero que remate'l mes d'ochobre'l conveniu aprobáu pol Conseyu d'Alministración de Xixón al Norte'l 7 de mayu de 2018 en visu a rematar la so tramitación alministrativa y dar en la so firma.