Menu

El coordinador Asturianu recuerda que 700 families pueden vese afectaes y el Federal esixe al Gobiernu de Pedro Sánchez valentía pa evitar que la multinacional cumpla los sos planes de zarru

 

El coordinador xeneral d’IX Asturies, Ramón Argüelles, esixó güei en Madrid al Gobiernu d'España que busque soluciones pa evitar el cese de la producción d'aluminiu n'Asturies y Galicia. El dirixente recordó qu'un zarru patronal afectaría a 700 families, apinando, amás, el cayente de cuenques yá bien castigaes por anteriores reconversiones. "Venimos pa esixir a la Ministra d'Industria qu'eso nun sía realidá (el zarru), esto ye, que sigan calteniendo la producción”.

P’Argüelles, arrenunciar n'España al aluminiu nun tien sentíu, tanto porque nestos momentos la compañía da beneficios como porque'l fin de la producción nun va significar el fin del usu d'esti material. "L'aluminiu va siguise consumiendo n'España: asina qu'el que se peracaba n'España, que se produza n'España", enfantizó.

El máximu responsable d’IX Asturies recordó qu’ALCOA tien tamién una responsabilidá social entá mayor por culpa de que, nos últimos años, la compañía recibió más de 1.000 millones d'euros en subvenciones: "tien qu'esplicar en qué los gastó pero, sobremanera, nun echar a 700 families a la cai".

La defensa d’ALCOA movilizó a Izquierda Xunida, cola presencia na manifestación convocada por Comisiones Obreres (CC OO) y otres centrales en Madrid con distintos cargos orgánicos ya institucionales d'Asturies pero tamién d'IX Federal, col so coordinador, Alberto Garzón, a la cabeza. Garzón pidió al Gobiernu del Partíu Socialista que sía "valiente" pa evitar un zarru inxustificáu. "Vimos como nos últimos años como se rescataron, per miles de millones d'euros, a bancos, a entidaes que fueron responsables de la crisis. Sicasí, cuando llega un casu de la economía real, de la economía granible, de la industria, atopamonos con que'l Gobiernu amuésase absolutamente pasivu, contemplativu...y, inclusive en dellos casos a favor de les multinacionales que lo que quieren faer ye siguir destruyendo los puestos de trabayu para siguir amontando los sos beneficios empresariales. Esto ye absolutamente intolerable en cualquier gobiernu pero entá lo ye más n'unu que se diz progresista".

A Madrid moviéronse distintos cargos políticos ya institucionales d’IX Asturies, como l'alcaldesa de Castrillón, Yasmina Trigueru, el d'Illas, Alberto Tirador, o’l conceyal en Gozón Isaac Frade

Tamién quixeron sumase a esta movilización de sofitu a les plantiyes d’Alcoa la secretaria de Política Municipal, Gabriela Álvarez, y el secretariu d'Acción Política, Juan Ponte, y decenes d'afiliaos y afiliaes d'IX de toa Asturies.