Menu

Concha Masa reclama planificación y resolvimientu per parte de la Conseyería d'Educación, amás de la publicación nel BOPA del alcuerdu asturianu

El Conseyeru d'Educación y Cultura, Genaro Alonso, condiciona la publicación nel BOPA del alcuerdu de la mesa de negociación del profesoráu que supondría rebaxar de 20 a 18 hores la carga lectiva del profesoráu a la derogación del real decretu qu'amontó l'horariu lectivu per parte del Gobiernu nacional. Alonso repitió, énte les insistentes entrugues de la diputada d'IX Concha Masa, que l'amenorgamientu horariu va aplicase'l 1 de setiembre d'esti mesmu añu, “sí o sí” tal como taba previstu y que va implicar la contratación de 417 places de profesoráu más, llegando hasta les 10.734.

La vocera d'IX, recordó que dempués de toa una llexislatura de reivindicaciones del profesoráu, por fin convocóse a les organizaciones pa roblar l’alcuerdu del amenorgamientu horariu, con un primer tropezón onde solo CCOO y SUATEA apoyaron esta midida, pero dempués finalmente en segundu intentu llogróse l'alcuerdu y roblóse en payares 2018. “Lo lóxico ye que fuera suscritu pol Conseyu de Gobiernu y treslladáu al BOPA pero nun lo ficieron, de forma inesplicable, trés meses dempués”, reprochó Masa, de la que recordó que la coalición tuvo vixilante en que la partida pa profesores derivada d'esti amenorgamientu fora efectivamente conseñada nel presupuestu.

Inda ye mayor la esmolición cuando lleguen a los centros les instrucciones d'ellaboración de plantiya y oblígase a partir de la xornada de 20 hores, lo que nos paez descomanadamente esmolecedor pa los centros y trabayadores, esplicó Masa.

La diputada d'IX, alvirtió de que, si de verdá hai voluntá d'aplicar l'alcuerdu tendría de planiase 18 hores y non sobro 20 pa tener que camudalo nos próximos meses coles consecuencies qu'implicaríen los axustes d'última hora, d'aumentu la precariedá, de la interinidá, de torgar tresllaos, l'aumentu de medies xornaes…. Ensin resalvar que Gobiernu n'Asturies termina'l mandatu antes del 1 de setiembre y el Gobiernu nacional probablemente n'escases feches. “Ye fundamental que too tea perfectamente planiao y resuelto de forma clara”, demandó la diputada d'IX.