Menu

Gonzalo Bengoa reprocha que'l rexidor quiera faer creer que la inversión autonómica ye una llotería ensin nenguna clase de participación del Conceyu que, recuerda, tamién tresllada les sos prioridaes

El voceru d'IX en Llanera, Gonzalo Bengoa, reclamó al alcalde, Gerardo Sanz, que dexe de xugar colos vecinos de Cayés y qu'asuma la so responsabilidá en que les cuentes del Principáu pa 2020 nun contemplen nenguna partida pa la variante de la localidá. El conceyal aseguró que'l rexidor asítiase como una víctima cuando en realidá nun lo ye: “nun sabemos qué axustó l'Alcalde col Principáu. Lo que sí sabemos ye que los conceyos plantegen les sos prioridaes en cada negociación presupuestaria del gobiernu autonómicu. Espatuxar agora como si nun supiera que nun diba tener nengún conseñamientu ye una mera actuación teatral”.

Bengoa aseguró que les escuses de Sanz sobre una supuesta “discriminación” de Llanera nun se sostienen. “L'Alcalde quier faer creer a los vecinos y vecines que la repartida d'inversiones autonómiques ye una llotería que cai de forma arbitraria, como si antes de cerrase naide esplicára-y nada. Hai otres inversiones que sí se van a faer y tien d'esplicales porque, tarrezo, lo que pasó ye que ye'l mesmu Alcalde quien retardó la inversión en Cayés escoyendo otros proyectos”.

El conceyal y voceru d'IX en Llanera señaló que más allá de les escuses del rexidor, esiste una situación real na que'l Conceyu nun puede ser un pixín espectador. Nesti sentíu, amosóse satisfechu con que, a lo último equipu de Gobiernu tea dispuestu a tomar midíes pa garantizar un tráficu seguru y afayadizu pa la realidá de Cayés. “Bienveníu, n'IX defendemos dende hai enforma tiempu que se tomen midíes d'urxencia, anque sían parciales. La posición d'agraviu del alcalde nun ye creíble porque, si unu escucháralu o lu llee, paez que lo que se perdió ye la obra d'execución de la variante y en realidá, y eso callalo, lo que nun vien ye'l conseñamientu presupuestariu pa la redacción del proyectu. O lo que ye lo mesmo, de forma interesada pa despintar la so mala xestión, trata de faer recayer notres instituciones la so propia incapacidá”.