Menu

Vallina Masa defende que namái al traviés d'un sistema cien per cien públicu puen atayase les consecuencies de la medría de la desigualdá y la educación en valores democráticos ya igualdá

Izquierda Xunida d'Asturies presentó una proposición non de llei coles mires de reforzar la educación pública y establézase un procesu de supresión progresiva de los conciertos educativos. La vocera de la formación na Xunta Xeneral del Principáu, Ángela Vallina, y la ex diputada Concha Masa, defendieron güei la necesidá imperiosa de reforzar el sistema públicu énte los ataques de la estrema derecha.

Vallina aseguró que se ta viviendo un momentu d'ataques a los derechos y les llibertaes y a un cuestionamientu a consensos pa llograr la efectiva igualdá ensin nengún tipu de discriminación. “Gustaríame empezar la rueda de prensa llamentando l'asesinatu d'otra muyer ayeri, porque yá llevamos un mes de xineru nel que yá vamos por cinco muyeres (asesinaes), paezme qu'esto ye tamién un síntoma”. Ello ye que esti nuevu crime llega nuna etapa na qu'hai grupos que quieren retayar la educación n'igualdá, ésa, añedió Vallina, na que s'enseña lo que ye'l machismu y el maltratu. Frente a ello, la diputada abogó por empezar dende la escuela “concenciando y enseñando valores”.

Ángela Vallina recordó que'l Tribunal Constitucional respondió por la llibertá pa escoyer centros educativos pero non asina la obligación del Estáu a financiar escueles privaes. Por eso, señaló, la proposición non de llei que se presentó lo que pretende ye encamentar al Gobiernu de la Nación pa promover una nueva llei educativa ente que los sos oxetivos ta la xeneración d'un sistema educativu públicu cien per cien abondu.

Concha Masa, pela so parte, esplicó que se trata de defender la rede educativa pública como la “única”, dixo, que puede ufiertar una educación integral ya integradora”, sol principiu de equidad.4

Nestos tiempos nos que se produció una medría de la desigualdá, señaló Masa, la escuela tien de contribuyir como un factor d'equilibriu, compensando les desigualdaes sociales, tanto en conocencia como en valores.

La PNL reclama que, sía que non y de manera inmediata, tórguese cualquier tipu de conciertu con centros educativos onde nun esista coeducación pa evitar que se siga “amparando la segregación y la desigualdá”.

Tamién inclúi imposibilitar el “distritu únicu” pa evitar un mecanismu que, según IX, “aumenta les desigualdaes al apigurar en centros a la población por estatus socioeconómicu”.

Amás, reclámase que, en tanto se modificar la lexislación educativa nacional, el Principáu suprima toles unidaes que nun sían imprescindibles nos procesos de renovación de conciertos.

Vallina refuga'l pin parental que califica de “vetu”

La vocera d'IX refugó'l pin parental impulsáu pola estremaderecha y col que flirtea la derecha asegurando que ye, en realidá, un ”vetu” pa imponer que “los padres apatayen los derechos de los fíos”. Vallina añedió que tampoco puede utilizase'l dineru público pa educar nel machismu, na ignorancia, na homofobia o nel racismu. Equí interesa confundir, y al señor Casado (Pablo) habría que recorda-y lo que diz la mesma llei Wert, que foi aprobada por ellos (PP), ensin axustar con naide. Y voi lleelo lliteralmente: ente los sos oxetivos ta'l desenvolvimientu de la escuela de los valores que fomenten la igualdá efectiva ente homes y muyeres, según la prevención de la violencia de xéneru; la educación nos derechos y les llibertaes fundamentales; na igualdá de derechos ente homes y muyeres y na igualdá de tratu y non discriminación de les persones con discapacidá. Esto ye lo que tendría que recordar el señor Casado”.