Menu

El diputáu plantega na Comisión de Salú que se cubran les baxes de médicos y enfermeres nos equipos d'atención a pacientes terminales

El diputáu d’IX Ovidio Zapico apostó güei na Comisión de Salú pol derechu a una muerte digna, más allá de la “teoloxía del sufrimientu” hasta agora remanada pola derecha pa oponese a la llegalización de la eutanasia. L'anunciu del Gobiernu central de “abrir la puerta” a unes normatives regularizadores ye pal grupu Parlamentariu d'IX, enfatizó el parllamentariu, “una bien bona noticia”.

Zapico refugó que la medría de los cuidaos paliativos fadríen innecesaria la eutanasia, un argumentu que, esplicó, “de forma torticera”, usase dende los sectores más conservadores. “Ye una afirmación radicalmente falsa. Creo, amás, que la derecha relixosa vieno calteniendo dende siempres que'l sufrimientu ye una condición necesaria del procesu de la muerte, daqué que pa mi, pal mio grupu parlamentariu, ye dafechu inaceptable”.

Según les estadístiques, unes 60.000 persones muerren con dolor n'España cada añu. Frente a ello, y teniendo en cuenta que la opinión pública sofita de forma mayoritaria la regularización de la eutanasia, Zapico defendió que se llexisle d'una vegada por toes. Eso sí, matizó, la lexislación nun puede dir en desterciu de los cuidaos paliativos que, añedió, tienen de ser de “calidá, con una cobertoria afayadiza, con personal bien formáu”.

Ovidio Zapico preguntó na Comisión de Salú pola posibilidá de reforzar con más personal l'equipu de paliativos de l’Área sanitaria VII y reclamó que se supla’l personal d'eses unidaes cuando'l médicu o la enfermera queden de “vacaciones, baxa o excedencia”.

El diputáu reconoció qu'esiste una planificación y un mapa asistencial que, basándose en datos demográficos y epidemiolóxicos y teniendo en cuenta los recursos, define los equipos de sofitu a cuidaos paliativos. La cuestión, na so opinión, nun ye tantu la teoría sinón la práctica, que ye la que define'l númberu real d'efectivos.