Menu

Ángela Vallina apuesta por reforzar servicios como l’ERA, Atención Primaria o Valoración de la Dependencia, con midíes p’ameyorar en tola función pública eficiencia y eficacia.

Izquierda Xunida reclamó güei na Xunta Xeneral del Principáu un pactu políticu y tamién sindical pa encetar la reforma de l'Alministración Autonómica, anunciada apocayá pol presidente del Principáu, Adrián Barbón. La vocera d'IX, Ángela Vallina, aseguró qu'esta reforma tien d'empobinase a llograr la máxima eficiencia y eficacia y, sobremanera, a garantizar unos Servicios Públicos calidables. La diputada señaló que la reforma ye necesaria pero que nun puede amazcarase so la mesma retayos de plantiyes yá que, dixo, otra manera, en munchos departamentos esisten déficits de recursos humanos.

Pa IX, el principal retu que ye necesario encetar ye'l de modernización y dixitalización de l'alministración autonómica que, magar la llei pa facilitar l'accesu al traviés d'internet a la ciudadanía, lléva un gran retrasu. L'Alministración de Xusticia, esplicó Vallina, atópase bien retrasáila y nin siquier tien operativu l'espediente xudicial electrónicu. Fai falta, por tanto, apostar por esta modernización qu'esixe, dixo, inversiones importantes. Ello ye que l'alministración de “papel 0” nun ta entá en marcha, a pesar de que, una vegada llograda van producise importantes aforros materiales y, tamién, una meyora medio-ambiental.

Vallina señaló que la reforma tien d'encetar la situación de los distintos departamentos de l'Alministración y, avanzó, va riquir fortalecer árees imprescindibles y que tán Infradotadas dende la perspectiva de los recursos humanos, como la rede de xeriátricos del ERA, l'Atención Primaria, o'l serviciu de valoración de la Dependencia onde esiste una perimportante llista d'espera que, a xuiciu de la parllamentaria, hai qu'atayar.

Sía que non, la reforma, enfatizó la diputada, tien de faese buscando'l máximu consensu políticu posible y, tamién, la negociación colos representantes de los y les trabayadores públiques.