Menu

Ángela Vallina esixe que se solucionen los problemes nes zones rurales y respuestes pa colectivos especialmente vulnerables escluyíos

Izquierda Xunida pidió güei a la Conseyera d'Educación, Carmen Suárez, que resuelva d'una vegada por toes los problemes de tresporte escolar, especialmente nes zones rurales, pero tamién que dea respuesta a les necesidaes de colectivos especialmente vulnerables que tán escluyíos como asocede con alumnos del Sanatoriu Marítimu, qu'a pesar de les sos dificultaes nun pueden acoyese a esti serviciu al contemplase tan solo a quien tien dificultaes motores. La vocera de la formación na Xunta Xeneral del Principáu, Ángela Vallina, reprochó que, añu tres d'añu, cada entamu de cursu abrase con problemes polo que pidió, amás, que se planie con antelación pa evitar nuevos problemes n'años vinientes. La situación agrávase, a xuiciu de la diputada, por que primen los intereses del Consorciu de Tresporte d'Asturies (CTA) sobro los derechos de los escolares, daqué que, enfatizói, nun ye una opinión d'IX sinón que foi señaláu nun informe de la Sindicatura de Cuentes.

Ángela Vallina recordó que la Conseyería regula'l derechu al tresporte escolar nel Resolvimientu del 5 de xunu de 2017, magar, dixo, "ye inxusta y enriba nun cumple. Ye inxusta porque dexa fora del derechu al tresporte escolar a alumnos y alumnes con necesidaes educatives especiales de naturaleza non motora". Esta esclusión, dixo, supunxo que delles families tuvieren qu'optar por desescolarizar a los sos fíos y fíes al nun poder pagar un tresporte que pue suponer 200 euros al mes, como asocedió con alumnos del Sanatoriu Marítimu de Xixón.

Más allá de casos concretos como'l de Villanueva en Siero, Vixidel en Teberga, La Rebollá en Riosa o Tene en Quirós, la parllamentaria esplicó que nes zones rurales esisten más casos que van apaeciendo a midida que les families denuncien problemes, rellacionaos col tresporte por cuenta de la difícil orografía asturiana y a la dispersión nel doblamiento, daqué que, ironizó, ensin falta d'un Comisionado pal Retu demográficu yá se sabía. "Los llugares onde esisten más problemes nel tresporte escolar son precisamente los de la zona rural, llugares nos qu'hai situaciones, y non poques, nes que cenciellamente se niega l'accesu a un tresporte escolar dignu a dellos neños y neñes porque viven llueñe y, dende les entidaes responsables, dízse-yos a los padres coses tan estrañes como que'l Resolvimientu ampara que la parada del autobús tea a menos d'un kilómetru y mediu de la casa onde vive l'alumnu o alumna. Esto ye, táse-yos diciendo que caminen nun kilómetru y mediu dende la so casa a la parada tolos díes o, que si nun hai autobús nin taxi programáu, la solución ye llevar los padres en coche al colexu o al institutu y yá se-yos va pagar la gasolina. Ye la mesma romandela repitida añu tres d'añu al entamu de cada cursu.

Esta deficiente garantía d'accesu a servicios y derechos tan básicos como la educación, refartó Ángela Vallina, difícilmente cásase con nengún plan pa revertir el cayente poblacional de les zones rurales.

Énte esta situación, IX pidió soluciones pa los problemes yá detectaos y denunciaos y, sobremanera, xuna previsión que torgue que se vuelvan a repitir. "Rogaría-y que tome midíes col Consorciu (de Tresportes); sabemos de munchos casos en particular onde paez que manden ellos, y esto ta pagao con dineru público".